ლიეტუვის საგარეო საქმეთა მინისტრის, გაბრიელიუს ლანდსბერგისის განცხადებით, ისინი მხარს უჭერენ საქართველოს მთავრობის მოთხოვნას დაუყოვნებლივ გათავისუფლდეს ოკუპირებული ცხინვალის ციხეში უკანონოდ მყოფი საქართველოს მოქალაქე, ზაზა გახელაძე.

"ჩვენ ბატონი გახელაძის დაუყოვნებლივ გათავისუფლების საჭიროებაზე ვისაუბრეთ. ეს საქართველოს მთავრობისთვის ძალიან მწვავე საკითხია და ჩვენ მხარს ვუჭერს საქართველოს მთავრობის მოთხოვნას — უკანონოდ დაკავებული ადამიანი დაუყოვნებლივ გათავისუფლდეს", — განაცხადა ლანდსბერგისმა ევროკავშირის საგარეო საქმეთა მინისტრების სამხრეთ კავკასიაში ვიზიტის თაობაზე გამართულ შემაჯამებელ, საერთო პრესკონფერენციაზე.

საერთო პრესკონფერენციას ესწრებოდნენ ჟურნალისტები როგორც საქართველოდან, ასევე, სომხეთიდან და აზერბაიჯანიდან.

ევროკავშირის უმაღლესი წარმომადგენლისა და ვიცე-პრეზიდენტ ჯოზეფ ბორელის მანდატით, საქართველოში, სომხეთსა და აზერბაიჯანში რუმინეთის, ავსტრიისა და ლიეტუვის საგარეო საქმეთა მინისტრების ვიზიტი მიმდინარეობს, რომელიც სამი ქვეყნის პირველ პირებთან შეხვედრას მოიცავს. ბოგდან აურესკუ, ალექსანდერ შალენბერგი და გაბრიელიუს ლანდსბერგისი დღეს, 26 ივნისს საოკუპაციო ხაზთანაც იმყოფებოდნენ.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: