საქართველოს პრემიერმინისტრის, ირაკლი ღარიბაშვილის განცხადებით, მისთვის მიუღებელია ის პირობები, რაც ნამახვანჰესის პროექტის ხელშეკრულებაში წერია. მან, ასევე, აღნიშნა, რომ პროექტი მემკვიდრეობით დახვდა. ღარიბაშვილის თქმით, ხელშეკრულება უნდა გადაიხედოს.

"რა თქმა უნდა, მიუღებელია ის პირობები რაც იქ წერია, თუნდაც 100 წელი და სხვა პირობები, რომელიც იქ ჩამოწერილია. მქონდა დამფუძნებელთან საუბარი. ჩემი მოწვევით იგი იყო საქართველოში, გვქონდა საუბარი მათთან და ჩვენი პრინციპული პოზიცია არის, რომ ეს პირობები უნდა გადაიხედოს. ახლა ვმუშაობთ აქტიურად, ქალბატონი ნათია [თურნავა] არის ჩართული", — განაცხადა ღარიბაშვილმა პარლამენტში წლიური ანგარიშის წარდგენის შემდეგ დასმული კითხვის პასუხად.

მისივე თქმით, შესაბამისი რეიტინგისა და ავტორიტეტის მქონე საერთაშორისო კომპანია შერჩეულია, რომელიც ნამახვანჰესის პროექტისა და კონტაქტის საერთაშორისო პრაქტიკასთან შესაბამისობას შეისწავლის.

"თუ კიდევ რაიმე დამატებით შეუსაბამომას აღმოვაჩენთ და ამის შესაბამისი დასკვნაც იქნება, რა თქმა უნდა, ამასაც გავითვალისწინებთ. იქ არის პრინციპული საკითხები, რაც დამატებით ემოციას იწვევს ჩვენში და ყველას გვესმის ეს, რაზეც აქტიური მუშაობა მიმდინარეობს ინვესტორთან, რომ ეს პირობები შეიცვალოს", — განაცხადა პრემიერმინისტრმა.