ცენტრალური საარჩევნო კომისიის თავმჯდომარის, თამარ ჟვანიას განცხადებით, 31 ოქტომბრის არჩევნების შემდეგ მასზე იყო ზეწოლა, თუმცა იყო ძლიერი, რადგან მის უკან იდგა სიმართლე.

"პირდაპირ ვიტყვი, რომ როდესაც მე აი იმ ძალიან დიდი ზეწოლის და შეიძლება ითქვას, შანტაჟის, მუქარის, შეურაცხყოფის პირობებში მე ვიყავი ძლიერი, ძლიერი ვიყავი იმიტომ, რომ ჩემ უკან იდგა, ჩვენს საარჩევნო ადმინისტრაციის უკან იდგა სიმართლე. ჩვენ ველოდებოდით დასტურს, სად ვიყავით მტყუანი. ასეთი დასტური არ არსებობს", — განაცხადა თამარ ჟვანიამ.

ასე უპასუხა მან არჩევნების შემსწავლელი საპარლამენტო კომისიის წვერის, ალუდა ღუდუშაურის კითხვას, მისი გადადგომის მოთხოვნებთან დაკავშირებით. ჟვანიამ, ასევე, განაცხადა, თანამდებობის დატოვების საკითხი ცესკოს თავმჯდომარის გადასაწყვეტია და არა პოლიტიკური პარტიების.

"ყოველთვის ვფიქრობდი, რომ გადადგომის საკითხი, წასვლა-დარჩენის საკითხი, უნდა იყოს საარჩევნო ადმინისტრატორის გადასაწყვეტი. იმიტომ, რომ ის არის დამოუკიდებელი ადმინისტრაციული ორგანოს ხელმძღვანელი და არცერთ პოლიტიკურ ძალას, ვინც არ უნდა იყოს ის — ხელისუფლებაში მყოფი თუ ოპოზიციაში მყოფი პოლიტიკური ძალა — არ უნდა ჰქონდეს საშუალება და არ უნდა შეიქმნას პრეცედენტი, რომ მისი პოლიტიკური სურვილის გამო ადმინისტრატორები იცვლებოდნენ. ეს ვიქნები მე, თუ შემდეგი ნებისმიერ ადმინისტრატორი", — განაცხადა თამარ ჟვანიამ.

ჟვანია ამბობს, რომ ბრალდებებს, რომლებიც მისი და ცესკოს მიმართულებით იმის მტკიცებულებები არ მოჰყვება.

"არსებობს ბრალდებები, რომლებიც არის ცარიელი, მტკიცებულებების გარეშე [...] თვეების განმავლობაში ჩვენ ველოდებოდით ამ მტკიცებულებებს. მათ შორის, ალბათ თქვენი კომისიაც ელოდებოდა და მე, ყოველ შემთხვევაში, მათ შორის არც დღეს არ მინახავს რომ აქ ვინმე შემოსულიყო ამ დღეების განმავლობაში და რაღაც მტკიცებულება მოეტანა", — განაცხადა თამარ ჟვანიამ.

დღეს პარლამენტში, 2020 წლის 31 ოქტომბრის არჩევნების შემსწავლელი დროებითი საგამოძიებო კომისიის სხდომაზე ცესკოს თავმჯდომარეს, თამარ ჟვანიას მოუსმინეს.

გაიგე მეტი: