ინდონეზიაში, დასავლეთ იავას ქალაქ ჩიანჯურში კოვიდვაქცინაციის წახალისების მიზნით ხელისუფლება მოსახლეობას მაცდუნებელ პირობას სთავაზობს: ვაქცინირებულ ადამიანებს საჩუქრად ცოცხალი ქათმები გადაეცემათ.

"ბოლო პერიოდში ინტერნეტში, განსაკუთრებით სოციალურ ქსელებში ვაქცინის შესახებ დეზინფორმაცია ვრცელდება. უამრავი ასაკოვანი ადამიანი ფიქრობდა, რომ ვაქცინას Covid-19-ის პრევენცია არ შეუძლია და მძიმე დაავადებებს, ზოგჯერ კი სიკვდილსაც კი იწვევს", — ამბობს პროგრამაში ჩართული ერთ-ერთი პოლიციელი გალიჰ აპრია.

პროგრამა პოლიციამ პროვინციასთან შეთანხმებით გასულ თვეს წამოიწყო და ის, ძირითადად, 45 წელს გადაცილებულ მოქალაქეებში ვაქცინაციის წახალისებას ისახავს მიზნად. გალიჰის თქმით, პროგრამამდე ვაქცინაციის მსურველი 200 მოქალაქიდან მხოლოდ 25 იყო, ამჟამად კი ვაქცინაციის მსურველთა დღიური მაჩვენებელი 250-ს აღწევს.

გალიჰი აღნიშნავს, რომ ქათმების გადაცემა კეთილგანწყობისა და პატივისცემის ნიშანია. პროგრამის ფარგლებში 500 ქათამია გაცემული.

"არც კი ვიცოდი, რომ ვაქცინა მჭირდებოდა, თუმცა მას შემდეგ, რაც ქათამი მომიყვანეს და მითხრეს, რომ ვაქცინის გაკეთება შემეძლო, ასეც მოვიქეცი და ბედნიერიც ვარ", — ამბობს პროგრამაში ჩართული ერთ-ერთი მოქალაქე CNN-თან საუბრისას.

ინდონეზიაში კორონავირუსის 2 მილიონამდე შემთხვევაა დაფიქსირებული. გალიჰი თვლის, რომ ადგილობრივი ღონისძიებები ვაქცინირებულთა რიცხვს კიდევ უფრო გაზრდის.

"პროგრამამ ძალიან კარგი შედეგი აჩვენა. საოცარია იმის ხილვა, თუ როგორ აბედნიერებთ ასაკოვან ადამიანებს ქათმების დანახვა და ჩვენ, ამავდროულად, ვაქცინის წყალობით მათი დაცვაც შეგვიძლია", — ამბობს გალიჰი.

რა წვლილს შეიტანენ ქათმები პანდემიის წინააღმდეგ ბრძოლაში, ამას დრო გვიჩვენებს.