უკრაინის ეროვნული ნაკრები ფორმის შეცვლას არ აპირებს. უკრაინის საფეხბურთო ნაკრების პრესატაშემ, ალექსანდრ გლივინსკიმ პრესკონფერენციაზე განაცხადა, რომ ფეხბურთელებს მაისურებზე ექნებათ ლოზუნგი "დიდება გმირებს". უკრაინის ფეხბურთის ასოციაციამ ეს ლოზუნგი საფეხბურთო სიმბოლოდ დაამტკიცა.

"ეს ფორმა UEFA-ს მიერ იყო დამტკიცებული და ახლა ასოციაციის პრეზიდენტი რომში იმყოფება და ამასთან დაკავშირებით UEFA-ს წარმომადგენლებს ესაუბრება. და, დიახ, ჩვენ ამ ფორმით ვაპირებთ ევროპის ჩემპიონატზე თამაშს", — აღნიშნა გლივინსკიმ.

EURO 2020-ისთვის უკრაინამ ეროვნული ნაკრების ახალი ფორმა წარადგინა, რომელზეც ქვეყნის კონტურებია გამოსახული, ასევე, დატანილია წარწერები "დიდება უკრაინას", ხოლო საყელოს შიგნიდან წერია "დიდება გმირებს".

უკრაინის ფორმამ რუსეთის გაღიზიანება გამოიწვია, რადგან რუკის კონტურებში ანექსირებული ყირიმიც მოექცა. გარდა ამისა, ისინი ამტკიცებენ, რომ ამ ლოზუნგებს ნაციონალისტი უკრაინელები იყენებენ. დუმის დეპუტატებმა UEFA-სგან ფორმის აკრძალვაც მოითხოვეს

რუსეთის ჩივილის შემდეგ UEFA-მ უკრაინას მიუთითა, რომ ფორმა შეცვალოს. UEFA-ს გადაწყვეტილებით, მაისურზე რუკის კონტურები დარჩება. თუმცა საყელოზე დატანილი ფრაზა "დიდება გმირებს" უნდა წაიშალოს. ხოლო ფრაზა "დიდება უკრაინას" შეიძლება, დარჩეს.