"ხვალ მომეცემა შესაძლებლობა, ხვალ მოვალ, ხვალაც თუ გადადეს, ზეგ მოვალ", — ასე ეხმაურება ნაციონალური მოძრაობის თავმდჯომარე, ნიკა მელია პლენარული სხდომის დაგეგმილზე ადრე დასრულებას.

"თუ ხვალაც არ გადადეს და ენითაღუწერელი პრეცედენტი კვლავ არ გაიმეორეს, ხვალ მომეცემა შესაძლებლობა, ხვალ მოვალ, ხვალაც თუ გადადეს, ზეგ მოვალ, ზეგ თუ არ იქნება მაზზეგ, მაზზეგ თუ არ იქნება, იმის შემდეგ. დღეს იყო ორი უმნიშვნელოვანესი კანონპროექტი, ორივე ჯერ მოხსნეს დღის წესრიგიდან და შემდეგ სხდომა დახურეს. ერთი რამ, რაც დადასტურდა არის, რომ ამ პარლამენტს არც პარლამენტის თავმჯდომარე ჰყავს, არც არანაირი სუვერენული და ლეგიტიმური თანამდებობის პირი ქართული ოცნების მხრიდან. ეს არის თავიდან ბოლომდე ბიძინა ივანიშვილის მართული ხალხი", — განაცხადა მელიამ.

7-თვიანი ბოიკოტის შემდეგ პარლამენტში მისული ენმ-ს თავმჯდომარე დღეს პლენარულ სხდომაზე სიტყვით გამოსვლასა და განცხადების გაკეთებას გეგმავდა. მიუხედავად ამისა, პარლამენტის თავმდჯომარეს, კახა კუჭავას მელიასთვის სიტყვა არ მიუცია. მან სხდომა დახურულად გამოაცხადა.

დღეს 8 ივნისს ნაციონალური მოძრაობის დეპუტატები პარლამენტში მივიდნენ, თუმცა მე-10 მოწვევის პარლამენტის საგაზაფხულო სესიის პლენარულ სხდომაზე არ გამოცხადებულან. ისინი საკანონმდებლო ორგანოში სხდომის შესვენების დროს მივიდნენ. ნაციონალური მოძრაობის წევრების პარლამენტში არყოფნის გამო, დღეს ამნისტიის კანონპროექტის მოსმენა გადაიდო.

ამასთან, 7 ივნისს პარლამენტში ერთიანი ნაციონალური მოძრაობა — გაერთიანებული ოპოზიცია ძალა ერთობაშიას ფრაქცია შეიქმნა, როლმელსაც ხატია დეკანოიძე უხელმძღვანელებს. ფრაქცია 32 წევრისგან შედგება.

30 მაისს პარტიამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, ენმ შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი. იმავე დღეს საქართველოში ევროკავშირისა და ამერიკის შეერთებული შტატების საელჩოებმა განცხადება გაავრცელეს, სადაც აღნიშნეს, რომ ნაციონალური მოძრაობის პარლამენტში შესვლის გადაწყვეტილებას მიესალმებიან, მაგრამ წუხან ევროპული საბჭოს პრეზიდენტის, შარლ მიშელის დოკუმენტზე ხელის არმოწერის გამო.