ნამახვანჰესის მოწინააღმდეგე აქტივისტები აქციას ქუთაისში კომპანია ენკას ოფისთან მართავენ. ვარლამ გოლეთიანის განცხადებით, მათი ამ ლოკაციაზე მისვლა ხელისუფლებისთვის იმის შეხსენებაა, რომ ისინი ამ პროცესთან შეგუებას არ აპირებენ.

"ჩვენ ვნახეთ მთელი აი ამ პროტესტის განმავლობაში, რომ ხელისუფლება არ ითვალისწინებს საზოგადოების მოთხოვნას. არ იქნა ჩვენი პირობები შესრულებული. უმნიშვნელოვანესი ინტერესები სახელმწიფოსი და თითოეული ჩვენთაგანის ეწირება იმ პროცესს, რაც ხდება რიონის ხეობაში. ახლა ვხედავთ, რომ ევროკავშირის ჩართულობაც ხდება, შაბათს იგეგმება, მაგრამ ჩვენ არ გვაქვს იმის იმედი ხელისუფლების მხრიდან, რომ მოხდება იმ პირობების დაკმაყოფილება, რა პირობებსაც, მათ შორის, ევროკავშირი აყენებს. ჩვენ თავის დროზე ამ პირობების შესრულებაზე გვეთქვა მკაფიო უარი ხელისუფლების მხრიდან. პირობები იყო, რომ უნდა გასულიყო პოლიცია, აღებულიყო ბარიკადები და შეჩერებულიყო სამუშაოები. რადგან ვხედავთ ამ აბსოლუტურ გაუთვალისწინებლობას ხელისუფლების მხრიდან მოვედით დღეს კიდევ ერთხელ აქ, რომ შევახსენოთ მათ, რომ არ იფიქრონ ის, რომ ეს პროცესი ისე გაგრძელდება, როგორც მათ აქვთ ჩაფიქრებული და დაგეგმილი. ყველა შემთხვევაში ჩვენ, ქართველი ხალხი, შევაჩერებთ, იმ უსამართლობას, რაც ხდება", — აცხადებს გოლეთიანი.

გოლეთიანი პირობების არშესრულების შემთხვევაში კომპანიისთვის გზების გადაკეტვას აანონსებს.