სულ რამდენიმე დღეა, რაც დისნეის ერთ-ერთი ყველაზე ცნობილი ანტიგმირის — კრუელა დე ვილის შესახებ გადაღებული ფილმი გამოვიდა და უკვე გაგრძელებაზეც დაიწყეს ფიქრი.

როგორც ცნობილია, დისნეი კრუელას სიქველის წარმოების ადრეულ ეტაპზეა, რომლის შექმნაზეც კვლავ რეჟისორი კრეიგ გილეპსი და სცენარისტი ტონი მაკნამარა იმუშავებენ. ჯერჯერობით უცნობია მომავალი ფილმის სიუჟეტის დეტალები და ისიც, ემა სტოუნი დაუბრუნდება თუ არა ისევ მთავარ როლს.

კრუელა დისნეის საკულტო მულტფილმის ას ერთი დალმატინელი პრიქველია, რომელიც 1961 წლის ამ ანიმაციის მთავარი ბოროტმოქმედის შესახებ მოგვითხრობს. ფილმის მსოფლიო პრემიერა 28 მაისს შედგა (საქართველოში 3 ივნისს) და მიუხედავად იმისა, რომ დისნეიმ ის თავის სტრიმინგ სერვისზე ონლაინაც განათავსა, მაინც წარმატებული აღმოჩნდა კინოგაქირავებაში: შემოსავლებმა უკვე $48,5 მილიონს გადააჭარბა.

რაც მთავარია, დისნეის ამ ახალმა ფილმმა ყველასგან მოულოდნელად როგორც კინოკრიტიკოსების, ისე მაყურებლების უმეტესობისგან დადებითი შეფასებები დაიმსახურა და ალბათ, ბევრიც მოუთმენლად დაელოდება ისტორიის გაგრძელებას.