თბილისის საქალაქო სასამართლომ ნინოწმინდის პანსიონიდან შეზღუდული შესაძლებლობის მქონე ბავშვების გამოყვანის გადაწყვეტილება მიიღო. ინფორმაციას ამის შესახებ პარტნიორობა ადამიანის უფლებებისთვის (PHR) ავრცელებს.

ანა არგანაშვილის განმარტებით, კანონის მიხედვით მათი ორგანიზაცია არის სპეციალური მოსარჩელე შშმ ბავშვებისთვის და სწორედ ამიტომ, გადაწყვეტილება მათთან დაკავშირებით იქნა მიღებული. თუმცა, მისივე თქმით, მთელი გადაწყვეტილება ეხება იმას, რომ იქ საფრთხე ყველა ბავშვისთვისაა, ყველა ბავშვის სიცოცხლე შეიძლება იყოს საფრთხეში და ეს ტექნიკური დეტალი მხოლოდ სამართლებრივი ტექნიკაა.

"მთელი სასამართლო გადაწყვეტილება ეხება იმას, რომ იქ არის საფრთხე ყველა ბავშვისთვის, ყველა ბავშვის სიცოცხლე და ჯანმრთელობა შეიძლება იყოს საფრთხეში. ამიტომ ტექნიკური დეტალი, რომელიც გვეუბნება, რომ შშმ ბავშვები უნდა გავიდნენ, არის მხოლოდ სამართლებრივი ტექნიკა. ჩვენ ღრმად ვართ დარწმუნებული, რომ თუ იქ არის საფრთხე, არ შეიძლება, რომელიმე ბავშვი დავტოვოთ საფრთხეში, მიუხედავად იმისა, რომ ჩვენი კანონმდებლობით ჩვენ მხოლოდ შშმ ბავშვების უფლებების დაცვა შეგვიძლია სპეციალური მოსარჩელის სტატუსით", — აცხადებს არგანაშვილი.

ანა აბაშიძემ მოსამართლე ივანე ღლონტის გადაწყვეტილება წაიკითხა და თქვა, რომ ის სრულად დაეთანხმა საფრთხის არსებობაში.

"სასამართლო მიიჩნევს, რომ იქედან გამომდინარე, რომ იზრდება იმის ალბათობა, რომ საქმეზე საბოლოო გადაწყვეტილების მიღებამდე სარჩელის უზრუნველყოფის გამოუყენებლობის შემთხვევაში, შეილახოს ბავშვთა ინტერესები და მას მიადგეს მნიშვნელოვანი ზიანი, ამასთან, აღსანიშნავია, რომ საკითხი ეხება არასრულწლოვანთა ინტერესებს, რომელთა სიცოცხლესა და ჯანმრთელობას შეიძლება შეექმნას საფრთხე".

ანა აბაშიძემ წაიკითხა მოსამართლის შემდეგი განმარტებაც:

"ვიხელმძღვანელე რა მტკიცებულებებით, მათ შორის, თავად პანსიონატში მოთავსებული არასრულწლოვანი პირების განმარტებით, ბავშვის საუკეთესო ინტერესის დაცვის უზრუნველყოფის გათვალისწინებით, სასამართლო მივიდა დასკვნამდე დაკმაყოფილდა შუამდგომლობა".

აბაშიძის თქმით, ეს ნიშნავს იმას, რომ დაუყოვნებლივ, ყოველგვარი ხელშეშლის გარეშე, დღესვე უნდა დაიწყოს ბავშვების გაყვანა პანსიონიდან.

გარდა ამისა, ორგანიზაციის მოთხოვნა იყო, რომ დაწესებულებიდან გამოსული ბავშვები უნდა განთავსდნენ ისეთ ადგილას, რაც მათ საუკეთესო ინტერესებს მოემსახურება. ასეთი ალტერნატიული ზრუნვის ფორმები მათი შეფასებით არის მინდობით აღზრდა, მცირე საოჯახო საოჯახო ტიპის სახლი და რეინტეგრაცია, რაც ბავშვების ბიოლოგიურ მშობლებთან დაბრუნებას ნიშნავს.

"სწორედ ეს უნდა იყოს სახელწიფოს მთავარი მიზანი, რომ სადაც შესაძლებელია, პირველ რიგში, განიხილოს ამ ბავშვები ბიოლოგიურ მშობლებთან დაბრუნება და მხოლოდ ამის შემდეგ, მიიღოს გადაწყვეტილება სხვა ალტერნატიული ზრუნვის ფორმებში, იქნება ეს მინდობით აღზრდა თუ მცირე საოჯახო ტიპის სახლი, ამ ფორმებში ბავშვების გადაყვანასთან დაკავშირებით. ჩვენი ორგანიზაცია, რა თქმა უნდა, მიადევნებს თვალს როგორ მოხდება ამ გადაწყვეტილების აღსრულება და ზრუნვის რომელი ფორმები იქნება შერჩეული თითოეული ბავშვის შემთხვევაში. აუცილებელია, სახელმწიფომ ყველა ბავშვის საჭიროება ინდივიდუალურად შეაფასოს და მხოლოდ ამის შემდეგ მიიღოს გადაწყვეტილება, სად მოხდება მისი განთავსება", — ამბობენ ორგანიზაციაში.

ანა აბაშიძის თქმით, ეს ბრძოლის ერთ-ერთი ნაწილია, ამით არაფერი დასრულებულა. მან აღნიშნა, რომ ბავშვებმა დღეს, ყოველგვარი ხელშეშლის გარეშე უნდა დატოვონ დაწესებულება და თუ ვინმე ეცდება გადაწყვეტილების აღსრულებას ხელი შეუშალოს, ეს სისხლის სამართლის დანაშაულია.

ანა აბაშიძემ, ასევე, აღნიშნა, რომ მოპასუხეებს, ანუ ჯანდაცვის სამინისტროსა და სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მოსამართლის გადაწყვეტილება ელექტრონული ფოსტის საშუალებით გადაეგზავნებათ, რადგან ორშაბათს და სასამართლოს ოფიციალურ გზავნილს არ დაელოდონ. ორგანიზაცია განჩინებას გამოაქვეყნებს ვებ-გვერდსა და Facebook-სის ოფიციალურ გვერდზეც.

რა ხდება ნინოწმინდის პანსიონში

15 აპრილს სახალხო დამცველის წარმომადგენელი საპატრიარქოს ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონში არ შეუშვეს. ომბუდსმენის აპარატში აცხადებენ, რომ ამის მიზეზად, დაწესებულების წარმომადგენელმა სხალთის მთავარეპისკოპოსის, მეუფე სპირიდონის მითითება დაასახელა. განმარტება გააკეთა თავად სპირიდონმაც და ჰომოფობიური მიზეზი დაასახელა — მისი თქმით, პანსიონში ომბუდსმენის წარმომადგენლებს იმიტომ არ უშვებს, რომ "ერთნაირსქესიანთა ქორწინების დაკანონებას ითხოვენ და ასეთებს თავის ბავშვებს საჯიჯგნად ვერ მისცემს".

ამის შემდეგ ორგანიზაციამ პარტნიორობა ადამიანის უფლებებისთვის თბილისის საქალაქო სასამართლოს მიმართა და მთავრობისგან ნინოწმინდის პანსიონში ყველა შესაბამისი უწყების მიერ მონიტორინგის ჩატარების უზრუნველყოფა მოითხოვა. სასამართლოს ეს მოთხოვნა არ დააკმაყოფილა, თუმცა დააკმაყოფილა გაერომ და შესაბამისად, მთავრობა ვალდებულია, უზრუნველყოს მონიტორინგი.

მიუხედავად ამისა, სახალხო დამცველს პანსიონში შესვლის საშუალება ამ დრომდე არ ეძლევა. სახელმწიფო ზრუნვის სააგენტოში კი 4 ივნისს განაცხადეს, რომ მას შემდეგ, რაც ბავშვთა ზრუნვის სამსახურს შესაძლებლობა მიეცა შესულიყო პანსიონში და თავისი საქმიანობა განეხორციელებინა, 6-მა ბავშვმა დაწესებულება დატოვა, ხოლო ათთან მუშაობა მიმდინარეობს. ამას მოჰყვა პანსიონის დირექტორის, მეუფე სპირიდონის ფსიქოლოგიური ძალადობა იმ ბავშვებზე, რომლებმაც წასვლის სურვილი გამოთქვეს. სასულიერო პირმა გაავრცელა ვიდეო, სადაც ბავშვებს ეკითხება, ნამდვილად უნდათ თუ არა წასვლა პანსიონიდან და პარალელურად, ესაუბრება მათ მშობლებს. ვიდეოში ჩანს ბავშვის ტირილი, რამდენიმე მოზარდის სახე, ასევე, სპირიდონი ამბობს მათ სახელებს. ამ ყველაფერს ესწრებიან, სავარაუდოდ, სოციალური მუშაკები, რომლებსაც, ვიდეოს მიხედვით, ფაქტზე რეაგირება არ აქვთ.

პანსიონში არ უშვებენ მედიასაც, თუმცა გამონაკლისი აღმოჩნდა პრორუსული Alt-info და TV ობიექტივი, რომელთა სიუჟეტები ეკლესიის დადებითად წარმოჩენას ისახავს მიზნად და ჟურნალისტი პანსიონში "იდეალური პირობების" არსებობას ამტკიცებს.

ნინოწმინდის პანსიონში არსებულ პრობლემებზე სახალხო დამცველი წლებია საუბრობს, მათ შორის, ძალადობაზე და დასჯის შემთხვევებზე. ის, რომ სავარაუდო ძალადობაზე საპატრიარქოს და შესაბამის უწყებებს ინფორმაცია ჰქონდათ, შსს-ს განცხადებითაც დასტურდება. კერძოდ, უწყება ამბობს, რომ 2016 წლიდან დღემდე პანსიონში განვითარებულ მოვლენებზე 5 საქმე აღიძრა — 4 ძალადობაზე და 1 სავარაუდო გაუპატიურებაზე.

1 საქმე მედიაში ბენეფიციარის მიერ ძალადობაზე ინფორმაციის გასაჯაროების შემდეგ აღიძრა, თუმცა მანამდე მიმდინარე 4 გამოძიების შედეგი ჯერ დამდგარი არ არის. შსს მიზეზად მტკიცებულებების ნაკლებობას ასახელებს.