ქობულეთში, სოფელ ციხისძირში არსებულ მიწის ნაკვეთებზე მდებარე სახელმწიფო საკუთრებაში არსებულ მრავალწლიან ნარგავებს სსიპ სახელმწიფო ქონების ეროვნული სააგენტო აუქციონზე ყიდის.

სამი ხის საწყისი ფასი 13 ათასი ლარია. ხეების სიმაღლე 25 მეტრიდან იწყება.

ხეებიდან ერთ-ერთია ამბრის ხე. აუქციონის საიტზე განთავსებული ინფორმაციის მიხედვით, მისი გარშემოწერილობა 2,4 მეტრია, ხოლო სიმაღლე - 30 მეტრი.

35-დან 40 მეტრამდე მერყეობს ევკალიპტის ხის სიმაღლე, მისი გარშემოწერილობა 5,55 მეტრია. სამი ხიდან ყველაზე დაბალია სექვოიას ხე. მისი სიმაღლე 25 მეტრია, ხოლო გარშემოწერილობა - 4,2 მეტრი.

როგორც სახელმწიფო ქონების ეროვნულმა სააგენტოს პრესსამსახურმა On.ge-ს უთხრა, ხეების შესახებ დაინტერესება არსებობდა, სწორედ ამიტომ გადაწყდა აღნიშნული ხეების გაყიდვა.

კითხვაზე, თუ ვინაა დაინტერესებული პირი, გვიპასუხეს, რომ ინფორმაცია კონფიდენციალურია, თუმცა აუქციონის დასრულების შემდეგ, მისი ვინაობა გასაჯაროვდება.

უკვე ერთ წელზე მეტია, რაც ყოფილ პრემიერმინისტრს, ბიძინა ივანიშვილს აჭარიდან, მათ შორის ციხისძირიდან, ასწლოვანი ხეები გადააქვს ურეკში, საკუთარ დენდროლოგიურ პარკში.