სენატორის ჯინ შაჰინის განცხადებით, ამერიკის შეერთებული შტატები და ასევე, საერთაშორისო საზოგადოება ოქტომბრის მოახლებულ არჩევნებს ყურადღებით დააკვირდება. ამის შესახებ მან საქართველოში გამართულ პრესკონფერენციაზე ისაუბრა.

"ის პრობლემები, რასაც დღეს შეხევდრებზე ხაზი გავუსვით იყო, ადამიანის უფლებები, თავისუფალი და სამართლიანი არჩევნები, საარჩევნო რეფორმა, 19 აპრილის შეთანხმების მნიშვნელობა, სადაც ყველა პარტია მიიღებს მონაწილეობას. ეს ძალიან მნიშვნელოვანია საქართველოს დემოკრატიისთვის.

რაც შეეხება ოქტომბრის არჩევნებს, ის იქნება დაკვირვების ქვეშ საერთაშორისო საზოაგდოების მხრიდან და ჩვენც, ამერიკის შეერთებული შტატებიც ახლოდან დავაკვირდებით. ვფიქრობ, დამკვირვებლები გამოიგზავნებიან როგორც ევროპიდან, ასევე, აშშ-დან, რომ ვნახოთ, როგორ განვითარდება პროცესები არჩევნებზე", — განაცხადა მან.

შემოდგომაზე თვითმმართველობის არჩევნები უნდა ჩატარდეს. ოპოზიციაში უკვე საუბრობენ იმაზე, რომ ამ არჩევნებზე ისინი კვლავ გაერთიანებული სახით უნდა წარდგნენ. კერძოდ, არის ვარაუდი, რომ ოპოზიცია საერთო კანდიდატად ნაციონალური მოძრაობის თავმჯდომარეს, ნიკა მელიას დააყენებს.

თუმცა რამდენიმე პარტიამ ენმ-ს კანდიდატის მხარდაჭერაზე უარი უკვე თქვა, მათ შორის, სტრატეგია აღმაშენებლის ლიდერმა, გიორგი ვაშაძემ. მისი განცხადებით, უნდა შეიქმნას მესამე, "მძლავრი მიზიდულობის ცენტრი", რომლითაც ხელისუფლების ცვლილების პროცესი დაიწყება. მელიას კანდიდატურის მხარდაჭერაზე უარს აცხადებს მოქალაქეების ლიდერიც, ალეკო ელისაშვილი. მისი თქმით, პარტიაში მიდის მსეჯლობა, რომ თბილისის მერობაზე საკუთარი კანდიდატურა დააყენოს. რაც შეეხება გირჩი — მეტი თავისუფლების ლიდერის, ზურაბ ჯაფარიძეს, ის ამბობს, რომ თუ ექნება შემოთავაზება იყოს ოპოზიციის საერთო კანდიდატი უარს არ იტყვის და არც ვინმეს სასარგებლოდ თავის კანდიდატურას მოხსნის.

საკუთარი კანდიდატურა ჯერ არ დაუყენებია არც მმართველ პარტიას. მედია საუბრობს იმაზე, რომ მოქმედი მერი, კახა კალაძე ქართული ოცნების კანდიდატი არ იქნება. ამას არ ადასტურებენ "ოცნების" ლიდერები. ირაკლი კობახიძის თქმით, პარტიაში "ყველას, 36 ათასივე წევრს" ექნება სურვილი, რომ კახა კალაძე თბილისის მერობის კანდიდატი იყოს. მისი განცხადებითვე, კალაძე "ერთ-ერთი გამორჩეული ლიდერია" და უპირველეს ყოვლისა, თავად მის პოზიციაზეა დამოკიდებული, იქნება თუ არა ის მერობის კანდიდატი.

გარდა ამისა, ვრცელდება ინფორმაცია, რომ საკუთარ კანდიდატურას დააყენებს ყოფილი პრემიერმინისტრი, გიორგი გახარიაც. ამას სკეპტიკურად უყურებს მმართველი პარტია. ქართული ოცნების თავმჯდომარის, ირაკლი კობახიძის განცხადებით, თუ გახარია თბილისის მერობის კანდიდატად საკუთარ თავს დააყენებს "საუკეთესო შემთხვევაში მესამე ადგილზე გავა".