ისრაელში პრემიერმინისტრ ბენიამინ ნეთანიაჰუს მოწინააღმდეგე ოპოზიციური პარტიები კოალიციის შექმნაზე შეთანხმდნენ. მათ მიერ მთავრობის ჩამოყალიბების შემთხვევაში ნეთანიაჰუს 12-წლიანი პრემიერობა დასრულდება.

იაირ ლაპიდმა, რომელიც ცენტრისტული პარტიის ლიდერია, განაცხადა, რომ კოალიცია რვა პარტიას გააერთიანებს. როტაციის თანახმად, თავდაპირველად პრემიერმინისტრი მემარჯვენე პარტია იამინის ლიდერი, ნაფტალი ბენეტი იქნება, ხოლო შემდგომ ლაპიდი.

თუმცა სანამ მთავრობა ოფიციალურად შეუდგება უფლებამოსილებას, მას პარლამენტმა უნდა დაუჭიროს მხარი. ლაპიდის თქმით, კოალიციის შესახებ მან უკვე შეატყობინა პრეზიდენტ რეუვენ რივლანს.

"მე გპირდებით, რომ ეს მთავრობა ყველა ისრაელელის საკეთილდღეოდ იმუშავებს", — განაცხადა მან.

სამთავრობო კოალიციას არაბული პარტიაც უერთდები, რაც ათეულობით წლის განმავლობაში პირველად ხდება. სხვა არაბულმა პარტიებმა განაცხადეს, რომ ბენეტის მთავრობის წინააღმდეგ გამოდიან, რადგან ის უარყოფს პალესტინის სახელმწიფოს კონცეფციას.

არაბული პარტიის ლიდერი, მანსურ აბასი აღნიშნავს, რომ გადაწყვეტილების მიღება რთული იყო, თუმცა შეთანხმება არაბი მოსახლეობის საკეთილდღეოდ ბევრ რამეს შეცვლის.

თუ ოპოზიციის კოალიციამ 120 დეპუტატისგან შემდგარ პარლამენტში მხარდაჭერა ვერ მოიპოვა, ისრაელი ბოლო ორი წლის განმავლობაში მეხუთე არჩევნების ჩატარების საფრთხის წინაშეა.

თვითონ პრემიერმინისტრი ბენიამინ ნეთანიაჰუს პარტია ლიკუდმა საპარლამენტო არჩევნებში ხმების უმრავლესობა მოიპოვა, თუმცა ეს არ აღმოჩნდა საკმარისი ახალი მთავრობის ჩამოსაყალიბებლად. მას არც კოალიციური მთავრობის შეკვრა გამოუვიდა. ნეთანიაჰუმ შემოთავაზებულ ახალ მთავრობას "საუკუნის თაღლითობა" უწოდა და განაცხადა, რომ ის საფრთხეს უქმნის ისრაელის სახელმწიფოსა და ხალხს.