შინაგან საქმეთა სამინისტრო აცხადებს, რომ 29 მაისს თბილისში, უზნაძის ქუჩაზე, "აფხაზეთის განათლების ცენტრის" მიმდებარე ტერიტორიაზე, 22 წლის ახალგაზრდა ცივი იარაღით დაჭრეს. უწყების ცნობით, დაჭრილი კაცი საავადმყოფოში გადაიყვანეს, სადაც მას გადაუდებელი ოპერაცია ჩაუტარდა. მისი ჯანმრთელობის მდგომარეობა სტაბილურად მძიმეა.

შსს-ში აცხადებენ, რომ სამართალდამცველებმა ბრალდებულის იდენტიფიცირება მალევე მოახდინეს და მიმდინარე წლის 31 მაისს ბრალი დაუსწრებლად წარუდგინეს. 2 ივნისს კი, მოსამართლის განჩინებისა და პროკურორის დადგენილების საფუძველზე, ძებნილად გამოაცხადეს.

მომხდარზე გამოძიება საქართველოს სისხლის სამართლის კოდექსის 19-108-ე მუხლით მიმდინარეობს, რაც განზრახ მკვლელობის მცდელობას გულისხმობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.