ანტიოკუპაციური მოძრაობის წევრის დავით ქაცარავას მიერ გავრცელებულ ინფორმაციაზე სახელმწიფო უსაფრთხოების სამსახურში აცხადებენ, რომ საოკუპაციო რეჟიმის წარმომადგენლები ოკუპირებულ ტერიტორიაზე უკანონო ქმედებებს გარკვეული პერიოდულობით ახორციელებენ. სუს-ის ინფორმაციით, თითოეული აქტივობა სუს-ის მიერ საერთაშორისო პარტნიორებთან ერთად ფასდება ინდივიდუალურად.

"ყოველი აქტივობის და მისგან გამომდინარე საფრთხის შესახებ ხდება ადეკვატური რეაგირება საერთაშორისო პარტნიორების დახმარებით", — აღნიშნავენ უწყებაში.

შერიგებისა და სამოქალაქო საკითხებში სახელმწიფო მინისტრმა, თეა ახვლედიანმა განაცხადა, რომ ინციდენტთან დაკავშირებით საერთაშორისო პარტნიორები ინფორმირებულია. ახვლედიანის თქმით, დაუყოვნებლივ ჩაერთო სახელმწიფო უსაფრთხოების სამსახური და ამოქმედდა ცხელი ხაზი.

დავით ქაცარავამ გაავრცელა ინფორმაცია, სადაც ის ამბობდა, რომ პირველ ივნისს ხურვალეთში საოკუპაციო რეჟიმის წარმომადგენლებს მასშტაბურ წვრთნებს ატარებდნენ კავშირგაბმულობის რადიოტრენინგის კუთხით.