ნაციონალური მოძრაობის წევრის, ხატია დეკანოიძი თქმით, ქართული ოცნების თავმჯდომარის, ირაკლი კობახიძის განცხადება "შეშინებულის მუქარა" იყო. როგორც დეკანოიძე ამბობს, "ივანიშვილის რეჟიმის" წარმომადგენლებს არ სურდათ ბლოკის პარლამენტში ხილვა.

"მინდა მას [კობახიძეს] ვუპასუხო, რომ ჩვენ პარლამენტში რამე კონკრეტული პრივილეგიებისთვის ან თანამდებობებისთვის არ შევდივართ, ეს გადაწყვეტილება მივიღეთ იმისთვის, რომ რეჟიმის დასამარცხებლად დამატებით გვქონდეს ინსტრუმენტი.ჩვენი მთავარი ამოცანა, რისთვისაც ეს გადაწყვეტილება მივიღეთ, არის ის, რომ უნდა გამოვიყენოთ საპარლამენტო საქმიანობა, როგორც ერთ-ერთი მნიშვნელოვანი იარაღი რეჟიმის წინააღმდეგ საბრძოლველად. ჩენ არ გვჭირდება ძალაუფლების გადანაწილება ქართულ ოცნებასთან", — აღნიშნა დეკანოიძემ.

ქართული ოცნების თავმჯდომარის, ირაკლი კობახიძის განცხადებით, თუ ნაციონალური მოძრაობა "გონივრულ ვადაში" ხელს არ მოაწერს შარლ მიშელის დოკუმენტს, ვერ ისარგებლებენ დოკუმენტში ნახსენები პრივილეგიებით და ვერ ჩაერთვებიან იმ სამუშაო ჯგუფებში, რომელიც ამ შეთანხმების აღსასრულებლად შეიქმნა. კობახიძეს არ დაუკონკრეტებია, ულტიმატუმისთვის განსაზღვრულ "გონივრულ ვადად" რა თარიღი მიაჩნია. მისი თქმით, ამას პარტიისგან გავიგებთ მაშინ, როცა ამოიწურება.

მისი განმარტებით, თუ ნაციონალური მოძრაობა დოკუმენტს გონივრულ ვადაში არ მოაწერს ხელს, მსგავსი შედეგი დადგება:

• მონაწილეობას ვერ მიიღებენ ვერცერთი სამუშაო ჯგუფის მუშაობაში, რომელიც მიშელის დოკუმენტით გათვალისწინებული გადაწყვეტილებების მოსამზადებლად არის შექმნილი, ან მომავალში შეიქმნება;
• ვერ ისარგებლებენ ვერცერთ პრივილეგიით, რომელსაც ეს დოკუმენტი ოპოზიციური პარტიებისთვის ითვალისწინებს.

კობახიძემ აღნიშნა, რომ პარლამენტში შესვლის გადაწყვეტილება ენმ-ს მხრიდან არის მათი მარცხის აღიარება და პოლიტიკური კაპიტულაციის გამოცხადება.

"ამ პარტიამ ვერცერთი თავისი პირობა ვერ შეასრულა. "ვერ დამიჭერ", "არ გამოვალ" და " არ შევალ" დასრულდა დაჭერით, გამოსვლით და შესვლით. ამას აქვს მარტივი მიზეზი, საქართველოს ყავს ხელისუფლება, რომლის მხარეს არის სიმართლე და ძალა, რომელიც საზოგადოებრივ მხარდაჭერას ეფუძნება", — განაცხადა მან.

გუშინ, 30 მაისს, პოლიტსაბჭოს სხდომის შემდეგ ცნობილი გახდა, რომ ერთიანი ნაციონალური მოძრაობა პარლამენტში შედის. მიუხედავად ამისა, პარტია შარლ მიშელის დოკუმენტს ხელს არ მოაწერს.