პარლამენტში ქართული ოცნების დეპუტატი, მიხეილ სარჯველაძე მიიჩნევს, რომ ყოფილ პრემიერმინისტრსა და მის გუნდს დამოუკიდებლად წარმატების პერსპექტივა არ აქვს.

"მე ვფიქრობ, რომ ამ ეტაპზე და ამ გადმოსახედიდან არავითარი შანსი რაიმე რეალური წარმატებისა არ აქვს. მათ ჰქონდათ განვითარების და საკუთარი ხედვების განვითარების რეალური პერსპექტივები ქართული ოცნების პოლიტიკურ ჯგუფში. დამოუკიდბელად არავითარი შესაძლებლობა და პერსპექტივა არ აქვს", — განაცხადა სარჯველაძე.

გიორგი გახარია პარტიისა და გუნდის პრეზენტაციას დღეს, 29 მაისს გამართავს. როგორც ცნობილია, მის პარტიას საქართველოსთვის ერქმევა.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.