ბათუმელების განცხადებით, ლიბერთი ბანკიდან 3 მილიონ ლარზე მეტი მიითვისეს. მედიის ცნობით, ლიბერთი ბანკი ბათუმის ფილიალის ყოფილ მენეჯერს და კიდევ 14 თანამშრომელს სასამართლოში უჩივის.

გამოცემის ინფორმაციით, თანხა ძირითადად ბანკის ფილიალის ყოფილმა მენეჯერმა მიითვისა, თუმცა მათივე თქმით, საქმის მასალებში ამის შესახებ არაფერი წერია.

On.ge-ს ლიბერთი ბანკში უთხრეს, რომ დარღვევაზე ინფორმაცია ფინანსთა სამინისტროს საგამოძიებო სამსახურს უკვე გადაეცა. იქ არ აზუსტებენ, რა თანხაზეა საუბარი.

"ლიბერთი ბანკის მიერ, ბათუმის ერთერთ ფილიალში, აღმოჩენილი იქნა დარღვევის ფაქტი, რომელიც გამოძიებისთვის დაუყონებლივ გადაეცა ფინანსთა სამინისტროს საგამოძიებო სამსახურს. ლიბერთი ბანკი სრულად თანამშრომლობს საგამოძიებო ორგანოებთან და ბანკის ყველა ფილიალი შეუფერხებლად ფუნქციონირებს", — ნათქვამია განცხადებაში.

მათივე განცხადებით, მომხმარებლების თანხებს "არანაირი საფრთხე არ ემუქრება". On.ge მომხდარზე შინაგან საქმეთა სამინისტროსაც დაუკავშირდა. მათ პასუხს მიღებისთანავე შემოგთავაზებთ.