Facebook აღარ წაშლის პოსტებს, სადაც ნათქვამია, რომ კორონავირუსი ადამიანის მიერ შეიქმნა. ინფორმაციას ამის შესახებ CNN ავრცელებს.

მედიის ცნობით, ეს გადაწყვეტილება მას შემდეგ მიიღეს, რაც აშშ-ს პრეზიდენტმა ჯო ბაიდენმა კორონავირუსის ნამდვილი წარმომავლობის შესახებ მიმდინარე კვლევების გაძლიერება მოითხოვა.

CNN წერს, რომ ბაიდენმა ოფიციალურ პირებს 90 დღე მისცა, რათა ვირუსის ნამდვილი წარმომავლობა გამოიძიონ. რამდენიმე დღის წინ ამაზე ისაუბრა ამერიკის შეერთებული შტატების ალერგიისა და ინფექციურ დაავადებათა ეროვნული ინსტიტუტის ხელმძღვანელმა, ენტონი ფაუჩიმაც. მისი თქმით, არ არის დარწმუნებული, რომ კორონავირუსი ბუნებრივად წარმოიშვა და კვლევები მანამდე უნდა გაგრძელდეს, სანამ ზუსტად არ დაადგენენ, რა მოხდა ჩინეთში.