არასამთავრობო ორგანიზაცია სოციალური სამართლიანობის ცენტრი ნამახვანჰესის კასკადის პროექტთან დაკავშირებით დოკუმენტების გასაჯაროებას მოითხოვს. როგორც ორგანიზაციაში აღნიშნავენ, ხელმისაწვდომი უნდა გახდეს როგორც ხელშეკრულება, ისე ფინანსთა სამინისტროს დასკვნა, პროექტის ხარჯ-სარგებლიანობის ანალიზი და მთავრობის 2019 წლის 23 აპრილის განკარგულების განმარტებითი ბარათი.

25 მაისს გამოცემა მთის ამბებმა ნამახვანჰესის პროექტზე იუსტიციის სამინისტროს სავარაუდო დასკვნა გაასაჯაროვა, რომელშიც სახელმწიფოსთვის საზიანო ინტერესებზე იყო საუბარი. დასკვნის გასაჯაროებას მთავრობის წარმომადგენლები ჯერ არ გამოხმაურებიან.

სოციალური სამართლიანობის ცენტრი აღნიშნავს, რომ დასკვნა მთავრობის და სახელმწიფო კომპანიების მიერ აღებული ვალდებულებების მასშტაბურობას აკრიტიკებს მაშინ, როდესაც დასკვნის თანახმად "აღნიშნულის საპირისპიროდ, ამავე ხელშეკრულების ფარგლებში მაქსიმალურად არის დაცული [კომპანიის] უფლებები და შეზღუდულია მისი პასუხისმგებლობა და ვალდებულებები". ამასთან, ორგანიზაციაში აღნიშნავენ, რომ დასკვნაში არსებული შენიშვნები ხელშეკრულებასთან დაკავშირებით მათ მოსაზრებებსაც ემთხვევა.

"საზოგადოებისთვის ცნობილია, რომ არსებული პროტესტის საპასუხოდ, პრემიერ-მინისტრმა ირაკლი ღარიბაშვილმა რამდენიმე კვირის წინ ხელშეკრულების შესწავლა იუსტიციის სამინისტროს დაავალა. აშკარაა, რომ ამ მანიპულაციური ქმედებებით მთავრობა ცდილობს შექმნას მცდარი შთაბეჭდილება საკითხის შესწავლის და საზოგადოებრივი წუხილების რეაგირების შესახებ, მაშინ, როდესაც მათთვის იმთავითვე ცნობილი იყო იუსტიციის სამინისტროს კრიტიკული პოზიციები, რაც მთავრობის მიერ გაზიარებული არ ყოფილა. მეტიც, სამინიტროს მიერ მითითებული რისკები მთავრობამ არ დააზღვია და სამართლებრივი რისკების შემცველი ხელშეკრულება გააფორმა", — აღნიშნულია ორგანიზაციის განცხადებაში.

"ვალდებულებათა უმრავლესობა ეხება საქართველოს მთავრობას", "საჭიროა დამატებით შეფასდეს შესაბამისი უწყებების მიერ", "მოკლებულია ლოგიკურ საფუძველს" — ეს ფრაზები, რომელიც დღეს გასაჯაროებულ დოკუმენტში იკითხება, სავარაუდოდ, იუსტიციის სამინისტრომ საქართველოს მთავრობას, კერძოდ კი ეკონომიკის მინისტრის მაშინდელ მოადგილეს, ნათია თურნავას მისწერა. დოკუმენტი, რომელიც მთის ამბებმა გააასაჯაროა, 2019 წლის 30 მარტით არის დათარიღებული, ანუ ენკასა და მთავრობას შორის ხელშეკრულების გაფორმებამდე დაახლოებით 1 თვით ადრე და სწორედ ამ ხელშეკრულების მიზანშეწონილობას განიხილავს.

კერძოდ, დოკუმენტი მოიცავს 22 პუნქტს, რომელშიც განხილულია ხელშეკრულებაში არსებული უზუსტობები და მუხლები, რომელიც სჯობს დაზუსტდეს ან შეიცვალოს.

აღნიშნულ დოკუმენტს ხელს იუსტიციის მინისტრის მაშინდელი მოადგილე და ამჯამად პარლამენტის დეპუტატი, მიხეილ სარჯველაძე აწერს. სარჯველაძე ადასტურებს, რომ სამინისტრომ ისევე, როგორც სხვა მნიშვნელოვანი ხელშეკრულების დადებისას, ენკასთან ხელშეკრულებაც შეისწავლა, თუმცა კონკრეტულად დოკუმენტის დეტალებზე არ საუბრობს და ამბბოს, რომ არ ახსოვს.

ამავდროულად, ნამახვანჰესის მშენებლობის მოწინააღმდეგე აქტივისტები ამბობენ, რომ დადასტურდა მათი განცხადებები იმაზე, რომ ხელშეკრულება ქვეყნის საზიანოდაა შედგენილი და მთავრობამ დასკვნების მიუხედავად, ანტისახელმწიფოებრივი გადაწყვეტილება მიიღო.