ოცნების პარლამენტის თავმჯდომარის, შალვა პაპუაშვილის თქმით, კანონში არაფერი არ შეცვლილა. საჯარო სექტორში ქართული ენის სავალდებულოობასთან დაკავშირებით "სინამდვილეში წვრილმანი დეზინფორმაცია" გავრცელდა. "ქართული ენის ცოდნა იქნება ყოველთვის კრიტერიუმი იმისთვის, რომ საჯარო სამსახურში იმუშაო. ან ასეთ ტყუილს როგორ ამბობენ? ეს არის მიზანმიმართული დეზინფორმაცია და ანტიქართული პროპაგანდა. ამის სათავე იყო საიას ხელმძღვანელის განცხადება, რომელმაც სათავე დაუდო ამ დეზინფორმაციას", — ამის შესახებ პაპუაშვილმა ბრიფინგზე განაცხადა.

მისი თქმით,კარგი იქნებოდა, ბრიტანეთს ელჩი თუ ბოდიშს მოუხდიდა ქართველ ხალხს იმ დეზინფორმაციისთვის, რასაც მის მიერ დაფინანსებული ორგანიზაცია [საია] ავრცელებს.

შეგახსენებთ, რომ გუშინ, საიას თავმჯდომარემ, ნონა ქურდოვანიძემ სოციალურ ქსელში დაწერა, რომ "საჯარო დაწესებულების პირველადი სტრუქტურული ერთეულების ხელმძღვანელები და მათი მოადგილეები აღარ ითვლებიან საჯარო მოხელეებად. სახელმწიფო ენის ცოდნა სავალდებულოა საჯარო მოხელეებისთვის.

ამ კანონში შეტანილი სხვა მავნებლური ცვლილებების ფონზე ეს დეტალი გამორჩათ თუ გამოტოვეს, ვერ ცვლის იმ მოცემულობას, რომ საჯარო დაწესებულების სტრუქტურის ხელმძღვანელი ან მოადგილე შეიძლება იყოს პირი, რომელმაც ქართული არ იცის", – დაწერეა ნონა ქურდოვანიძე.

ამას გარდა, ოცნების პარლამენტის თავმჯდომარემ ისიც თქვა, რომ ისურვებდა, ბრიტანეთმა არ მისცეს თავშესაფარი ფორმულას დამფუძნებელ დავით კეზერაშვილს და ქართულ მართლმსაჯულებას გადმოსცეს, თუ ის დიდი ბრიტანეთის ტერიტორიაზე შევა.

"ვისურვებდი, რომ ბრიტანეთმა არ მისცეს თავშესაფარი დავით კეზერაშვილს. ჩვენთვის ცნობილია, რომ კეზერაშვილი. ბრიტანეთში საერთაშორისო კრიმინალი თავისუფლად გადაადგილდება და იქიდან აფინანსებს რადიკალურ ოპოზიციას და რადიკალურ NGO-ებს და ბრიტანეთში იცით რომ თავისუფალი მიმოსვლა აქვს ამ ადამიანს და დღემდე არ გვსმენია ბრიტანეთს ელჩის პოზიცია ამასთან დაკავშირებით. ქართველი ოლიგარქი კეზერაშვილი, რომელიც საერთაშორისო კრიმინალია რატომ აქვს მას შესაძლებლობა ბრიტანეთში თავისუფლად იმოძრაოს და არის თუ არა ნება, შემდეგ ჯერზე, როცა ის მოხვდება ბრიტანეთში, გადმოსცემ ის ქართულ მართლმსაჯულებას. მით უმეტეს, სტრასბურგმა დაადასტურა მისი დანაშაული ქართველი ხალხის და ქართული ჯარის წინაშე", — განაცხადა პაპუაშვილმა.