თბილისის მერიის თანამშრომელი გიგა სოფრომაძე სახალხო დამცველის მოკვლევის დაწყების თხოვნით მიმართავს. სოფრომაძის თქმით, საჯარო სამსახურში დასაქმებული ადამიანების ნაწილის მიერ საჯაროდ გავრცელებული განცხადების პასუხად, მოქმედი თანამდებობის პირები საჯარო მოხელეებს ემუქრებიან. გიგა სოფრომაძე ამბობს, რომ მაღალი თანამდებობის პირების განცხადებები და ასევე სუს-ის მიერ გავრცელებული განცხადება არის დაშინების მცდელობა.

"მივმართავთ საქართველოს სახალხო დამცველს, დაიწყოს მოკვლევა, საჯარო სამსახურში დასაქმებული ადამიანების ნაწილის მიერ საჯაროდ გავრცელებული განცხადების პასუხად, მოქმედი თანამდებობის პირების მხრიდან ჩვენ მიმართ, საჯაროდ და ღიად გამოხატულ მუქარასა და დაშინების მცდელობაზე, რომელიც დღითიდღე პრაქტიკულ სახესაც იღებს.
ბატონო ლევან, გთხოვთ, დაინტერესდეთ ჩვენი განცხადების თითოეული ხელმომწერი პირის ირგვლივ შექმნილი ვითარებითა და იმ პირობებით, რაშიც მათ უწევთ მუშაობა საკუთარი აზრის ღიად დაფიქსირების შემდეგ.
მიგვაჩნია, რომ ეს ყველაფერი შეიცავს დისკრიმინაციის მკაფიო ნიშნებს, რაც არ შეიძლება დარჩეს რეაგირების გარეშე. ჩვენ შევქმნით საჯარო სამსახურში დასაქმებულ პირთა პროფესიულ გაერთიანებას და კანონით განსაზღვრული სხვა ფორმებით დავიცავთ თითოეული დასაქმებულის უფლებებს.
ჩვენ ვრჩებით ჩვენი ქვეყნის, მოსახლეობის, კონსტიტუციისა და იმ გაცხადებული კურსის ერთგულნი, რომელიც კონსტიტუციის დონეზე გვაქვს დაფიქსირებული", — წერს სოციალურ ქსელში თბილისის მერიის შშმ პირთა საკითხებზე მომუშავე საბჭოს აღმასრულებელი მდივანი, გიგა სოფრომაძე.

თბილისის მერიის 200-ზე მეტი თანამშრომელი გაემიჯნა ქართული ოცნების მიერ ევროკავშირში გაწევრების პროცესის შეჩერებას. მათ განცხადება 30 ნოემბერს გამოაქვეყნეს. განცხადებაზე ხელმომწერები თბილისის მერიის სხვადასხვა დეპარტამენტში მუშაობენ.