ნიუ-ჰემფშირის პოლიციამ მერილინ მენსონის დაკავების ორდერი გამოსცა. ამის შესახებ გილფორდის პოლიციის დეპარტამენტმა ინფორმაცია Facebook-ზე გაავრცელა. ამის მიზეზი 2019 წელს მუსიკალურ კონცერტზე მომხდარი ინციდენტია, რომლის დროსაც მერილინ მენსონმა ოპერატორს განზრახ შეაფურთხა.

"ბატონმა უორნერმა [მერილინ მენსონი], მისმა აგენტმა და ადვოკატმა დაკავების ორდერის შესახებ დიდი ხანია იციან, თუმცა ნიუ-ჰემფშირში დასაბრუნებლად და არსებულ ბრალდებებზე პასუხის გასაცემად ჯერჯერობით არაფერი მოუმოქმედიათ", — აცხადებენ პოლიციაში.

მერილინ მენსონის ადვოკატმა ჰოვარდ კინგმა აღნიშნა, რომ ოპერატორმა მათგან $35 000-ის ანაზღაურება მოითხოვა, თუმცა მას შემდეგ, რაც მათ მიყენებული ზიანის დამადასტურებელი მტკიცებულებები მოითხოვეს, არავინ შეხმიანებიათ.

"აღნიშნული ბრალდება უბრალოდ სასაცილოა, თუმცა ჩვენ პოლიციასთან თანამშრომლობას ვაპირებთ ისე, როგორც ამას აქამდე ვაკეთებდით", — ამბობს ადვოკატი.

აღსანიშნავია, რომ ბრალის დადასტურების შემთხვევაში, მომღერალს 1 წლამდე პატიმრობა და $2 000-მდე ჯარიმა ემუქრება.

ამჟამად მერილინ მენსონის წინააღმდეგ გამოძიება ოჯახში ძალადობის ბრალდებით მიმდინარეობს. მომღერალი სექსუალურ, ფიზიკურ და ფსიქოლოგიურ ძალადობაში რამდენიმე ადამიანმა დაადანაშაულა, მათ შორის ყოფილმა შეყვარებულმა ევან რეიჩელ ვუდმა, Game of Thrones-ის მსახიობმა ესმე ბიანკომ, ყოფილმა ასისტენტმა ეშლი უოლტერმა და სხვებმა. მერილინ მენსონი აღნიშნულ ბრალდებებს უარყოფს.

ამავე თემაზე: