ბრიუსელის აეროპორტში 22 მარტს მომხდარი ტერაქტის მონაწილის, ნაჯიმ ლაშრუის, ძმა მურადი, 2016 წლის ოლიმპიადაზე, რიო-დე-ჟანეიროში, ბელგიის სახელით გავა.

მურადმა ოლიმპიური ლიცენზია, პარასკევს, 20 მაისს, ტაეკვანდოს ევროპის ჩემპიონატში ოქროს მედლის მოპოვების შემდეგ მიიღო. შვეიცარიაში გამართული შეჯიბრის ფინალში 21 წლის მურადმა ესპანელი მეტოქე დაამარცხა. ლაშრუი პირველ ოლიმპიურ შეხვედრას 5 აგვისტოს გამართავს.

სპორტსმენის განცხადებით, მან თავისი ძმის რადიკალიზაციის შესახებ არაფერი იცოდა.

"ბავშვობაში ახლოს ვიყავით, მაგრამ მას შემდეგ, რაც მე სპორტს გავყევი, ჩვენი გზები გაიყარა", განაცხადა მან.

ნაჯიმ ლაშრუიმ, სხვა ტერორისტებთან ერთად, თავი ბრიუსელის აეროპორტში აიფეთქა. ტერაქტის შედეგად 32 ადამიანი დაიღუპა.