კატალონიაში პოლიცია კაცის გარდაცვალების ფაქტს იძიებს, რომლის გვამიც დინოზავრის ქანდაკებაში აღმოაჩინეს.

როგორც გამომძიებლები აცხადებენ, ბარსელონასთან ახლოს მდებარე პატარა ქალაქ სანტა-კოლომაში მამა-შვილმა სეირნობისას 22 მაისს დინოზავრის ქანდაკებაში რაღაც უცნაური შენიშნა და პოლიციას შეატყობინა.

სამართალდამცავები პირველად დაკვირვებაზე დაყრდნობით აცხადებენ, რომ გარდაცვლილს ძალადობის ნიშნები არ აღენიშნება, ამიტომაც ვარაუდობენ, რომ ის უბედური შემთხვევის შედეგად დაიღუპა.

"დინოზავრის ქანდაკების ფეხის ნაწილში გარდაცვლილი კაცის სხეული ვიპოვეთ. ეს შედეგი გაუთვალისწინებელი შემთხვევით დადგა, ძალადობას ადგილი არ ჰქონია. როგორც ჩანს, დაღუპული დავარდნილი მობილურის პოვნას ცდილობდა, რა დროსაც ქანდაკებაში გაიჭედა. სავარაუდოდ, მან ჯერ თავი ამოყო შიგნით და იქიდან გამოსვლა ვეღარ შეძლო", — განაცხადა პოლიციის წარმომადგენელმა.

სამართალდამცავებს მეხანძრეების დახმარება დასჭირდათ, რომ ქანდაკება გაეჭრათ და გვამი ისე გამოეტანათ.

"ჯერ კიდევ ველოდებით აუტოპსიის დასკვნას, რადგან არ ვიცით, რამდენი ხანი იყო ის იქ, თუმცა, სავარაუდოდ, რამდენიმე დღე მაინც", — დაამატეს მედიასთან საუბრისას.

დაღუპული 39 წლის კაცია, რომლის გაუჩინარების შესახებაც ოჯახის წევრებმა რამდენიმე საათით ადრე მიმართეს პოლიციას, სანამ მის გვამს იპოვიდნენ.