ქართული ოცნების დეპუტატი, არჩილ თალაკვაძე ამბობს, რომ უკვე სერიოზული კითხვები ჩნდება, თუ რა არის ნამახვანჰესის მოწინააღმდეგეთა აქციების რეალური მიზანი.

"როცა პრემიერმინისტრმა განაცხადა, რომ კაშხლის მშენებლობაზე გამოცხადდა მორატორიუმი და შემდეგი თვეები მისი აშენება არ ხდება, როცა თქვა რომ გარემოზე ზემოქმედების შეფასება ხელახლა მოხდება და თქვა, რომ დადებული ხელშეკრულების შეფასება მოხდება დამოუკიდებელი ექსპერტის მიერ. მაინტერესებს, რას აპროტესტებს ამ ჯგუფის ორგანიზატორი? და რა არის დღეს მოთხოვნები თუ არა ის, რომ საერთოდ უაპელაციოდ გაუქმდეს ეს პროექტი. ეს დამოკიდებულება გახლავთ უბრალოდ მიუღებელი. ულტიმატუმები და კატეგორიებით საუბარი, ვფიქრობ, არ არის ის ფორმა, რომელიც დემოკრატიულ სახელმწიფოში უნდა არსებობდეს. ამიტომ მთავარი კითხვა გახლავთ ის — თუ მთავარი საკითხები რაც იყო, მშენებლობა შეჩერებულია, კონტრაქტის გადამოწმება და შეფასება ხდება, გარემოზე ზემოქმედება ხელახლა იქნება შეფასებული. მაინტერესებს, რა არის ის მოთხოვნები, რომელსაც დღეს ამ აქციის ორგანიზატორები აყენებენ. ეს ერთი და მეორე, უკვე ძალიან სერიოზული კითხვები ჩნდება, თუ რა არის ამ აქციების რეალური მიზანი და ვფიქრობ, აქ უკვე მეტი საჯარო განმარტებები უნდა გაკეთდეს აქციის ორგანიზატორების მხრიდან", — აცხადებს თალაკვაძე.

მისივე თქმით, საქართველოს სტრატეგიული ინტერესია გაიზარდოს ქვეყნის ენერგოდამოუკიდებლობის ხარისხი

"საქართველოს სტრატეგიული ინტერესი გახლავთ შემდეგი, რომ გაიზარდოს საქართველოს ენერგოდამოუკიდებლობის ხარისხი და საქართველოში ჩვენმა ენერგოსისტემამ გამოიმუშავოს მეტი ელექტროენერგია. ეს პირდაპირ არის დაკავშირებული ეკონომიკურ ზრდასთან და ახალ სამუშაო ადგილებთან. გვაინტერესებს, როცა ყველ კითხვაზე იყო შემხვედრი პოზიციები, იყო მოწოდება დიალოგისკენ, მზადყოფნაა დღესაც საგნობრივი საუბრის. რას ემსახურება ეს პროტესტი და არის თუ არა მიმართული საქართველოს ენერგოდამოუკიდებლობის წინააღმდეგ? ეს გახლავთ დღეს მთავარი კითხვები, რაზე პასუხები უნდა მოვისმინოთ. ჩვენ, რა თქმა უნდა, გვაქვს ჩვენი შეფასებები, ამაზე პასუხები სჭირდება საზოგადოებას", — ამბობს დეპუტატი.