ნამახვანჰესის საწინააღმდეგო აქციის ორგანიზატორის, ვარლამ გოლეთიანის განცხადებით, აქციის მონაწილეები მშრალი ხიდისკენ მსვლელობას იწყებენ, სადაც გზის გადაკეტვა აქვთ დაგეგმილი.

"10 წუთში 4 საათზე დავიწყებთ მსვლელობას რედისონის გავლით მშრალი ხიდის მიმართულებით, გაგვიძღვება მანქანა, რომელზეც იქნება დამონტაჟებული აპარატურა და გავყვეთ ამ მოძრაობას. მშრალ ხიდზე, სადაც გავჩერდებით და გადაიკეტება მოძრაობა ჩვენგან, იქ კიდევ მივმართავთ სიტყვით და მკაფიოდ ვიტყვით ჩვენს პოზიციებს — რა არის ამ ქმედების განმაპირობებელი და საფუძველი.

გვინდა მოვუწოდოთ მთელი ამ ისტერიის ფონზე, განსაკუთრებით თბილისის მოსახლეობას, რომ ნუ ავყვებით და შევყვებით ხელისუფლებას ამ ნარატივში, დავდგეთ ერთმანეთის გვერდით, ხალხმა უნდა მოვახერხოთ გაერთიანება ყველანაირი ნიშნის გარეშე", — თქვა მან.

მისი თქმით, პარლამენტის თავმჯდომარესთან კონტაქტზე თავად გავიდა, რათა გაეგო რა პასუხი ექნებოდათ, თუმცა ხელისუფლების მხრიდან შემდეგ კომუნიკაცია არ შემდგარა.

"ბუნებრივია, არ გვქონია მოლოდინი, რომ განსაკუთრებულს გვეტყოდა ეს ხალხი. უბრალოდ, არ ვაპირებთ, რევერანსები ვაკეთოთ, რომ გაგვეცით პასუხი. ჩვენ გვაქვს ჩვენი მკაფიო მოქმედების გეგმა და ახლა გადავალთ უშუალოდ ამ მოქმედების გეგმაზე", — განაცხადა გოლეთიანმა.

მეორე დღეა თბილისში, რესპუბლიკის მოედანზე ნამახვანჰესის საწინააღმდეგო აქცია იმართება. 23 მაისს აქციის მონაწილეებმა ადგილზე კარვებიც გაშალეს. ნამახვანჰესის მშენებლობის მოწინააღმდეგე პროტესტის ლიდერმა, ვარლამ გოლეთიანმა აქციაზე მოთხოვნები გააჟღერა და მათ შესასრულებად ხელისუფლებას 24 მაისის 12:00 საათამდე მისცა. მოთხოვნების შეუსრულებლობის შემთხვევაში მან დედაქალის პარალიზება დააანონსა.

მოთხოვნები, რომლებიც ვარლამ გოლეთიანმა აქციაზე გააჟღერა შემდეგია:

• დატოვოს რიონის ხეობა კომპანიამ ენკამ;
• გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
• გამოცხადდეს მორატორიუმი ენერგოსექტორში;
• გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

ნამახვანჰესის მოწინააღმდეგეებსა და ხელისუფლებას შორის უშედეგო მოლაპარაკებების შემდეგ პროტესტის დედაქალაქში გადმოტანის გადაწყვეტილება მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა აქციის მონაწილეების თქმით, მოსამზადებელ სამუშაოები არ გაჩერებულა.

პროტესტის თავდაპირველი ადგილი სოფელი ნამოხვანია, სადაც რამდენიმე თვის განმავლობაში ისინი ნამახვანჰესის მშენებლობას უწყვეტად აპროტესტებენ. მათ ადგილზე კარვები ჰქონდათ გაშლილი.

ისინი ამბობენ, რომ ეკოლოგიური საფრთხის გარდა, მთავრობამ მშენებელ კომპანიასთან გაფორმებული ხელშეკრულებით სახელმწიფო ინტერესები დათმო.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობს ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

რიონის ხეობაში ჰესს კომპანია ენკა აშენებს. ENKA აცხადებს, რომ ნამახვანჰესის პროექტი დეტალურადაა შესწავლილი და რაიმე საფრთხეს მოსახლეობისთვის ან ხეობისთვის არ წარმოადგენს.

გაიგე მეტი:

• აღვუთქვი, რომ რამდენიმე დღეში მიიღებენ პასუხს — ბარნაბიშვილი აქტივისტების პირობებზე
• რეპრესიულ მეთოდებს იყენებენ, მაგრამ, ეს მუშაობს ჩვენ სასარგებლოდ — გოლეთიანი
• მოიხსნა ის აპრიორი პირობა, რომ ჰესი ყველა შემთხვევაში აშენდება — მუსელიანი ნამახვანის თემაზე შეხვედრის შემდეგ
• შევთანხმდით, რომ წითელი ხაზების გარეშე ვლაპარაკობთ — სუბარი აქტივისტებთან დიალოგის დასრულების შემდეგ