პრემიერმინისტრმა, ირაკლი ღარიბაშვილმა ნამახვანჰესის მშენებლობის მოწინააღმდეგეებზე საუბრისას განაცხადა, რომ ულტიმატუმების დაყენება ბნელი 90-იანების გადმონაშთია. ულტიმატუმებზე საუბრისას ნამახვანის პროტესტთან მან სამოქალაქო ომისა და ოკუპაციის მოვლენები დააკავშირა და განაცხადა, რომ მაშინ "ვითომ პატრიოტიზმის ეგიდით" მყოფმა აქტივისტებმა, რომელიც სპეციალისტის როლს ირგებდნენ ცუდი შედეგი გამოიწვიეს.

"რაც შეეხება ულტიმატუმის ენით საუბარს, ეს არის კატეგორიულად მიუღებელი. ეს ყველა მოქალაქემ უნდა იცოდეს, რომ ულტიმატუმით საუბარი არის ეს არის ბნელი 90-იანების გადმონაშთი და ჩვენ კარგად გვახსოვს სწორედ ის ბნელი პერიოდი, 90-იანების, როცა ამ რაღაც ამ რაღაც ვითომ პატრიოტიზმის ეგიდით და საფარქვეშ ყველა აქტივისტი იყო "ძალიან კარგი სპეციალისტი" ენერგეტიკის, სოფლის მეურნეობის, ტრანსპორტის, რკინიგზის და ასე შემდეგ.

შედეგად რაც მივიღეთ კარგად მოგეხსენებათ, მივიღეთ სამოქალაქო ომი, დავანგრიეთ ჩვენ თვითონ ჩვენი ქვეყანა, ქარხნები დავშალეთ და მთლიანად ჩვენი ქვეყნის ძალიან მნიშვნელოვანი ნაწილის ოკუპაცია, სწორედ იმდროინდელი გაუაზრებელი პოლიტიკის შედეგი არის", — განაცხადა მან.

გარდა ამისა, მან მიმართა აქტივისტებს და "გონიერებისკენ მოუხმო". ღარიბაშვილმა აღნიშნა, რომ კანონდარღვევაზე ექნებათ შესაბამისი რეაგირება.

"აქედან გამომდინარე, მე მინდა ყველა იმ ადამიანს მივმართო და მოვუხმო გონიერებისკენ. სახელმწიფო იმართება კანონით და კონსტიტუციის ფარგლებში, ვინც გადავა კანონის ფარგლებს მიღმა, რა თქმა უნდა სახელმწიფოს ექნება შესაბამისი რეაგირება", — განაცხადა მან.

ღარიბაშვილის მტკიცებით, მათ ყველაფერი გააკეთეს, რომ მოქალაქეებისთვის მაქსიმალური ინფორმაცია მიეწოდებინათ. მისივე თქმით, ამის მზაობა ახლაც არის.

"ჩვენ ასევე შევთავაზეთ პროტესიტს მონაწილეებს შესაფერისი დიალოგის ფორმატი. არაერთი მცდელობა იყო ჩვენი მხრიდან, ჩემი პირადი წარმომადგენელი ჩავიდა და გუბერნატორი, მთელი სამინისტროები იყვნენ და არიან ჩართულები", — განაცხადა მან და დამატა, რომ საქმეში ევროკავშირის წარმომადგენელიც ჩაერთო და იუსტიციის სამინისტრო ხელშეკრულებას სწავლობს.

როგორც მან აღნიშნა, ამ საკითხზე ENKA-ს დამფუძნებელსაც შეხვდება, რომელიც ვიზიტით თბილისშ ჩამოდის.

"თვის ბოლოს მე ვხვდები ინვესტორი კომპანიის დამფუძნებელს და მფლობელს, რომელიც ეწვევა თბილისს. მე თავად ვარ ჩართული და მსურს გავერკვიო დეტალურად რომ რაიმე საწინააღდეგო არ იყოს ამ ხელშეწკრულებაში", — განაცხადა მან.

ნამახვანჰესის მშენებლობის წინააღმდეგ მიმდინარე აქციაზე აქტივისტმა, ვარლამ გოლეთიანმა აქციაზე მოთხოვნები გააჟღერა და მათ შესასრულებად ხელისუფლებას ვადა 24 მაისის 12 საათამდე მისცა. მოთხოვნების შეუსრულებლობის შემთხვევაში მან დედაქალის პარალიზება დააანონსა.

მოთხოვნები, რომლებიც ვარლამ გოლეთიანმა აქციაზე გააჟღერა შემდეგია:

• დატოვოს რიონის ხეობა კომპანიამ ენკამ;
• გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
• გამოცხადდეს მორატორიუმი ენერგოსექტორში;
• გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.