ვლადიმერ პუტინი იმუქრება, რომ კბილებს ჩაუმსხვრევენ ყველას, ვინც ცდილობს რუსეთს უკბინოს. ოკუპანტი ქვეყნის პრეზიდენტის აზრით, ყველას სურს, რუსეთს ტერიტორიები წაართვას, "მოაკბიჩოს". ის ნიშნის მოგებით ამბობს, რომ ამას არ დაუშვებენ, რადგან სამხედრო ძალა აქვთ.

"ყველას უნდა სადმე გვიკბინოს ან რამე მოგვაკბიჩოს. მაგრამ მათ, ვინც ამის გაკეთებას აპირებს, უნდა იცოდნენ, რომ ყველას კბილებს ჩავუმსხვრევთ ისე, რომ კბენა ვერ შეძლონ. ეს აშკარაა და ამის გარანტია ჩვენი სამხედრო ძალაა", — განაცხადა მან.

სახელმწიფო გამოცემის, Tass-ის ინფორმაციით, პუტინმა თქვა ისიც, რომ საბჭოთა კავშირი "ისტორიული რუსეთია":

"სსრკ სხვა არაფერია თუ არა რუსეთი, უბრალოდ, მას სხვანაირად ეწოდებოდა და იდეოლოგიურადაც სხვანაირი იყო, მაგრამ გეოპოლიტიკური ხედვით, რა თქმა უნდა, ეს ისტორიული რუსეთია".

მაშინ, როცა პუტინი რუსეთისთვის მიწების წართმევის საშიშროებაზე საუბრობს, საქართველოს ორი რეგიონი აქვს ოკუპირებული. აფხაზეთსა და ოსეთში საოკუპაციო რეჟიმს, სწორედ რუსეთი აკონტროლებს. გარდა ამისა, რუსეთს ანექსირებული აქვს ყირიმი.