სტრატეგია აღმაშენებლის ლიდერი, გიორგი ვაშაძე აცხადებს, რომ ქვეყანაში პოლიტიკური კრიზისი დასრულებულია.

"დამთავრდა კრიზისი, პოლიტიკური. დასრულებულია. ზოგი შემოვა-არ შემოვა, ეს აღარავის აინტერესებს.

საკონსტიტუციო უმრავლესობისთვის საკმარისი ხმები არის; საარჩევნო რეფორმა მიდის წინ და იცით, რომ საკითხების აბსოლუტურ უმრავლესობაზე შევთანხმდით; ახლა მართლმსაჯულებას უნდა მოვკიდოთ [ხელი] და საკონსტიტუციო ცვლილებებს; ამის პარალელურად, საპარლამენტო მექანიზმის გამოყენებას იწყებს ოპოზიცია, იმ ინიციატივებისთვის, რაც აწუხებს ხალხს", — განაცხადა ვაშაძემ TV პირველის ეთერში.

ჟურნალისტის შენიშვნაზე, რომ პარლამენტში ჯერ კიდევ არ შესულა ყველაზე დიდი ოპოზიციური პარტია, ნაციონალური მოძრაობა, ვაშაძემ ასე უპასუხა:

"რომც არ შემოვიდნენ, პირდაპირ გეუბნებით, ყველა ეს ცვლილება მაინც გავა. აბა რა?! შემოვლენ — შემოვლენ, არ შემოვლენ — არ შემოვლენ. ამაზე ხომ არ ვილაპარაკებთ მთელი ცხოვრება, შემოვლენ თუ არ შემოვლენ", — ამბობს ვაშაძე.

რამდენიმე დღის წინ, გიორგი ვაშაძემ განაცხადა, რომ "ნაციონალური მოძრაობა გადამგდებ პოლიტიკურ ძალად ჩამოყალიბდა" და თვითონაც არაერთხელ აღმოჩნდა "გადაგდებული". მან, ასევე, თქვა, რომ მაგარი იქნება, თუ ნაციონალური მოძრაობის თავმჯდომარე, ნიკა მელია საკუთარ პარტიას დატოვებს და მესამე პოლიტიკურ ცენტრს შეუერთდება.

ციხიდან გამოსვლის შემდეგ, ნიკა მელიამ განაცხადა, რომ გიორგი ვაშაძეზე გაბრაზებული არ არის.

გაიგე მეტი: