ფლორიდის საერთაშორისო უნივერსიტეტის პროფესორი და სახელმწიფო დეპარტამენტის ყოფილი მაღალჩინოსანი, დევიდ კრამერი ნიკა მელიას პატიმრობიდან გათავისუფლებაზე კომენტარს აკეთებს. ამერიკის ხმასთან საუბარში ის მელიას გათავისუფლებას დადებითად აფასებს და ურჩევს მთავარ ოპოზიციურ პარტიას, პარლამენტში შევიდეს.

"კარგია, რომ ნიკა მელია პატიმრობაში აღარ არის. სამწუხარო ისაა, რომ ევროკავშირის ნება გახდა საჭირო მისი გირაოს გადასახდელად. მიუხედავად ამისა, ახლა, როდესაც ის თავისუფალია, ენმ-მა უნდა დაიკავოს ადგილები პარლამენტში, ხოლო „ქართული ოცნება“ მზად უნდა იყოს, რომ ნაციონალურ მოძრაობას მისცეს საქმე კონკრეტულ კომიტეტებში და უზრუნველყოს მათი საჭირო რეპრეზენტაცია", — ამბობს კრამერი.

მისი თქმით, კრიზისი, რომელიც ახლა ქვეყანაშია, ქართულმა ოცნებამ შექმნა, თუმცა იმისთვის, რომ ეს პრობლემა დაიძლიოს, საჭიროა, უთანხმოებების წარსულში დატოვება და მომავალზე ორიენტირება.

"დროა საქართველოში ეს კრიზისი, რომელიც თებერვალში, ქართული ოცნების მესვეურებმა შექმნეს ნაციონალური მოძრაობის ოფისზე შტურმითა და მელიას დაკავებით, წარსულში დარჩეს. ამ ქმედებამ პოლიტიკური ჩიხი, პოლიტიკურ კრიზისად აქცია. საქართველოს არ შეუძლია კიდევ ერთი დღე მაინც დაკარგოს კრიზისში, ის დემოკრატიულ გზაზე უნდა დაბრუნდეს", — უთხრა ამერიკის ხმას კრამერმა.

ნიკა მელიამ რუსთავის #12 ციხე გუშინ, 10 მაისს დატოვა. სასამართლომ პროკურატურის შუამდგომლობა დააკმაყოფილა და მელიას პატიმრობა 40 ათასი ლარის ოდენობის გირაოთი შეუცვალა.

პროკურატურამ სასამართლოს მას შემდეგ მიმართა, რაც ევროკავშირმა ნიკა მელიას გირაოს თანხა ჩარიცხა.

გაიგე მეტი: