ტარიელ ნაკაიძე პარლამენტში შედის. მან ამის შესახებ პოლიტიკური საბჭოს სხდომის შემდეგ, ჟურნალისტებს განუცხადა. მისი თქმით, პარტიის გადაწყვეტილება პარლამენტში არშესვლასთან დაკავშირებით მისთვის გასაგები და მისაღებია, მაგრამ მნიშვნელოვანია საკანონდებლო ორგანოში წარმოადგინოს რელიგიური და ეთნიკური უმცირესობები და თემები, რომლებიც აქამდე ნაკლებად განიხილებოდა.

"ველოდებოდი პოლიტსაბჭოს შეკრებას, მეც გახლდით პოლიტსაბჭოს წევრი და იმ გადაწყვეტილებას, რომელიც მიიღო პოლიტსაბჭომ, რომ პარლამენტში არ უნდა შევიდეს, ვემხრობი და ვუჭერ მხარს. თუმცა ჩემი სპეციფიური ბექგრაუნდიდან გამომდინარე და იმ წარმომადგენლობითი ფონიდან გამომდინარე, რომელიც მე ამ შემთხვევაში მაქვს უმცირესობებთან დაკავშირებით, განსაკუთრებით რელიგიურ თუ ეთნიკურ უმცირესობებთან დაკავშირებით, ყველა ის გამოკითხვა, რომელიც მე ვაწარმოე ბოლო ამ დროის განმავლობაში, მაძლევს იმის საფუძველს, რომ დამოუკიდებლად ვიყო პარლამენტის წევრი, რა თქმა უნდა, ვერ და არ წარმოვადგინო ევროპული საქართველო. ეს არის ისტორიული სვლა საქართველოს პარლამენტის რეალობაში და ევროპულ საქართველოს ამ მიმართულებით ექნება საკუთარი ადგილი. შევეცდები მაქსიმალურად წარმოვადგინო ის თემი, ის თემები, რომელიც აქამდე, სამწუხაროდ, ნაკლებად განიხილებოდა საქართველოს პარლამენტში. სწორედ ამიტომ მივიღე ეს გადაწყვეტილება და ხვალიდან შევუდგები საპარლამენტო საქმიანობას", — აღნიშნა მან.

ჟურნალისტების კითხვას, ვისთან შეიძლება ითანამშრომლოს პარლამენტის წევრებს შორის, ნაკაიძემ უპასუხა, რომ ჯერ საქმიანობას გააგრძელებს, როგორც დამოუკიდებელი დეპუტატი. თუმცა, მისივე თქმით, აუცილებლობის შემთხვევაში, თუ ფუნქციების შესრულებისთვის საჭირო იქნება, გადაწყვეტილებას ამის მიხედვითაც მიიღებს.

მან მადლობა გადაუხადა ევროპულ საქართველოს, რომ მიეცა პარლამენტში მოხვედრის შესაძლებლობა და აღნიშნა, რომ ამ გუნდთან ერთად დიდი გამოცდილება მიიღო.

ტარიელ ნაკაიძე ქართველ მუსლიმთა კავშირის თავმჯდომარეა. ის 2020 წლის არჩევნებში ევროპული საქართველოს მაჟორიტარობის კანდიდატი იყო. დღეს ცნობილი გახდა, რომ პარტია პარლამენტში არ შედის. გადაწყვეტილება აკაკი ბობოხიძემ გამოაცხადა და აღნიშნა, რომ ტარიელ ნაკაიძე ან ევროპულ საქართველოს დატოვებს, ან პარლამენტს.

აღსანიშნავია, რომ 2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და როგორც დღეს გახდა ცნობილი, ტარიელ ნაკაიძემაც. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პარტია შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.