საგანგებო სიტუაციების მართვის სამსახურის განცხადებით, პეკინზე, საცხოვრებელი კორპუსის მე-5 სართულზე ხანძარი გაჩნდა, რომელიც ამ დროისთვის უკვე ლიკვიდირებულია. საგანგებოს ინფორმაციით, ხანძრის შედეგად არავინ დაშავებულა.

უწყების ცნობით, ძლიერი დაკვამლიანების გამო განხორციელდა მაცხოვრებლების, მათ შორის, არასრულწლოვნების ევაკუაცია, როგორც სადარბაზოდან, ასევე, სახანძრო კიბის საშუალებით.

"არსებობდა ცეცხლის დიდ ფართობზე გავრცელების საფრთხე, თუმცა მეხანძრე მაშველების ოპერატიული რეაგირების შედეგად მოხერხდა ხანძრის დროული ლოკალიზება და საშიშროება აღკვეთა", — ნათქვამია განცხადებაში.

საგანგებო სიტუაციების მართვის სამსახურის განცხადებით, ადგილზე 14 სახანძრო-სამაშველო ჯგუფი მუშაობდა და მობილიზებული იყო ყველა შესაბამისი აღჭურვილობა და ტექნიკა.