მიმდინარე წლის 7 მაისის მდგომარეობით, საპენსიო აქტივების საერთო მოცულობა 1,425 მილიარდი ლარია. საუბარია დაგროვებითი პენსიის ფონდზე, რომლის ნაწილი სადეპოზიტო სერთიფიკატებსა და ვადიან დეპოზიტებშია ინვესტირებული, ხოლო ნაწილი საპენსიო სააგენტოს მიერ კომერციულ ბანკებში გახსნილ მიმდინარე ანგარიშებზეა განთავსებული.

ფონდში არსებული თანხების დეპოზიტებზე განთავსების მიზანი საპროცენტო შემოსავლის მიღებაა. როგორც On.ge-ს საპენსიო სააგენტოდან აცნობეს, ბოლო ინფორმაციით, შენატანებზე დარიცხული სარგებლის ოდენობა 149,6 მილიონი ლარია.

დაგროვებითი პენსიის სქემაში საქართველოს 1,1 მილიონი მოქალაქეა ჩართული, რომელთაგან 30% — 30 წლამდე, 60,3% — 31-დან 55 წლამდე, ხოლო 9,7% 56 წლის და უფროსი ასაკის არის. სააგენტოს ინფორმაციით, ამ სისტემიდან 167,7 ათასი ადამიანია გასული. რაც შეეხება იმ მოქალაქეების რაოდენობას, რომლებმაც დაგროვებითი პენსიის სქემით ისარგებლეს, ბოლო მონაცემებით, ასეთი 828 ადამიანია.

საპენსიო სქემაში ჩართული ადამიანების ანგარიშზე მათი ხელფასის 6% ირიცხება — 2%-ს თავად დასაქმებული, 2%-ს დამსაქმებელი, ხოლო დანარჩენ 2%-ს სახელმწიფო იხდის. სქემაში ჩართვა 40 წელს ზემოთ პირებისთვის ნებაყოფლობითი, ხოლო 40 წლამდე მოქალაქეებისთვის სავალდებულოა. საქართველოში დაგროვებითი პენსიის სისტემა 2019 წლის იანვრიდან ამოქმედდა.