ვანისა და ბაღდათის მიტროპოლიტმა, მეუფე ანტონმა მთავარი არხის ჟურნალისტს ფიზიკური და სიტყვიერი შეურაცხყოფა მიაყენა. ტელეკომპანიის მიერ გავრცელებულ კადრებში ჩანს, რომ ინტერვიუსთვის მისულ ჟურნალისტს მეუფე ანტონი აგრესიით ხვდება და მოუწოდებს, რომ ადგილი დატოვოს.

მთავარი არხის ინფორმაციით, შემთხვევა 7 მაისს მოხდა, როდესაც ჟურნალისტი, ირაკლი ვაჩიბერაძე ვანი-ბაღდათის ეპარქიაში ჟურნალისტურ საქმიანობას ასრულებდა.

მეუფემ ჟურნალისტს მის ეპარქიაში მისვლა აუკრძალა, რაზეც მან განუცხადა, რომ მისი გადასაწყვეტია სად მივიდოდა, ამის შემდეგ მეუფე ანტონი მთავარი არხის ჟურნალისტს ფიზიკურად შეეხო.

მთავარი არხი მოითხოვს, რომ აღიკვეთოს მიზანმიმართული ძალადობრივი კამპანია არხის წინააღმდეგ და ტელეკომპანიის ჟურნალისტებისთვის საქმიანობაში ხელის შეშლა. ასევე, ტელეკომპანია ხელისუფლებისგან მოითხოვს კანონის შესაბამისად დაისაჯოს ყველა პირი, განურჩევლად მისი რელიგიური კუთვნილებისა ან იერარქიული მდგომარეობისა.

"მთავარი არხი აცხადებს, რომ გახშირდა ძალადობრივი ინციდენტები ჩვენი ჟურნალისტების წინააღმდეგ და ეს, ჩვენი შეფასებით, ატარებს მიზანმიმართულ ხასიათს. სამწუხაროა, რომ ამ კამპანიაში აქტიურად არიან ჩართული ქართული მართლმადიდებელი ეკლესიის დაბალი თუ მაღალი იერარქიის წარმომადგენლები. კიდევ უფრო სამწუხარო და საგანგაშოა, რომ საქართველოს საპატრიარქო არათუ არ რეაგირებს მსგავს ფაქტებზე, არამედ ამართლებს და ამგვარად ახალისებს სასულიერო პირების მხრიდან დანაშაულის ნიშნების შემცველ ქმედებებს ჟურნალისტების წინააღმდეგ", — წერია ტელეკომპანიის მიერ გავრცელებულ განცხადებაში.

On.ge აღნიშნულზე დაუკავშირდა შინაგან საქმეთა სამინისტროს და ინფორმაციას მოწოდებისთანავე შემოგთავაზებთ.