კარტოგრაფის, ივერი მელაშვილის განცხადებით, დავით გარეჯში მას სიტყვიერი შეურაცხყოფა თავდაპირველად სასულიერმა პირებმა მიაყენეს. ის ამაზე On.ge-ს ესაუბრა და შემთხვევის დეტალები გაიხსენა.

"თავდაპირველად სასულიერო პირები იყვნენ ისინი, კი ბატონო. ჩამოვიდნენ, აგრესიულად იქცეოდნენ. არ უნდა აკეთებდეს ამას სასულიერო პირი, რაც მათ, ყოველ შემთხვევაში ზოგიერთმა, იკადრა და იგინა", — უთხრა მან On.ge-ს.

მისი თქმით, ადამიანები, რომლებმაც მას სიტყვიერი შეურაცხყოფა მიაყენეს, ჩვეულებრივი მოქალაქეები არინ, "უბრალოდ შეცდომაში შეყვანილები".

"მე ასეთი დასკვნა გამოვიტანე, რომ შეიძლება ორკესტრირებული ვიღაცის მიერ იყო, მაგრამ, ყოველ შემთხვევაში, ბევრი მონაწილე — ვინც ახლა ვთქვათ მესაუბრებოდა, ზოგი მაგინებდა, ზოგს კითხვა ჰქონდა — ესენი არიან ჩვეულებრივი მოქალაქეები, უბრალოდ შეცდომაში შეყვანილები. იმათ ვიღაცამ უთხრა, ჩაუდო თავში, რომ აი, ეს არის გამყიდველი და თურმე ამან გაყიდა გარეჯი და რაღაც ტერიტორიები.

მელაშვილის განცხადებით, ეს ყველაფერი დაწყებულია მთავრობის განცხადებებისა და მათ მიერ ხალხზე "ზემოქმედებისგან".

"არადა, ყველამ ხომ უნდა იცოდეს, რომ გარეჯის მონაკვეთი საერთოდ არ არის შეთანხმებული. პროკურატურაც კი ვერ მიდგენს ამის შესახებ ბრალს. მაგრამ ეს არის ყველაფერი დაწყებული მთავრობიდან, უპასუხისმგებლო განცხადებებმა და ხალხზე ზემოქემდებამ, აი, ეს გამოიწვია.

ეს გამოიწვია ქვეყნის შიგნით, მაგრამ ქვეყნის გარეთ, როგორ ართულებს მდგომარეობას კიდევ მეზობელ ქვეყანასთან და საერთოდ, სხვა საზოგადოების თვალში, ეს კიდევ სხვა თემაა", — გვითხრა მან.

დღეს 4 მაისს დავით გარეჯში მთავარი არხის გადამღებ ჯგუფსა და კარტოგრაფ ივერი მელაშვილს დაუპირისპირისპირდნენ. ტელეკომპანიის გავრცელებულ კადრებში ჩანს, რომ აგრესიული სასულიერო და სამოქალაქო პირები მელაშვილს ემუქრებიან და ჟურნალისტს ფიზიკურად უხეშად ეხებიან.