სტრატეგია აღმაშენებლის ლიდერის, გიორგი ვაშაძის განცხადებით, არჩევნებზე ნაციონალური მოძრაობის კანდიდატს, დიდი ალბათობით, მხარს არ დაუჭერს. მისი თქმით, უნდა შეიქმნას მესამე, "მძლავრი მიზიდულობის ცენტრი", რომლითაც ხელისუფლების ცვლილების პროცესი დაიწყება.

"კონკრეტულად ვერ გეტყვით ახლა გეგმებს, იმიტომ, რომ მაქსიმალურად კონცენტრირებული ვართ შეთანხმების რეალიზებაზე, რაც ნიშნავს იმას, რომ თუ ეს შეთანხმება არ მოხდა, ჩვენ გვექნება ისევ გაყალბებული არჩევნები. პირველ რიგში, მექანიზმი უნდა შევქმნათ, რომ სამართლიანი არჩევნები ჩავატაროთ ქვეყანაში, რომ იმ რეფერენდუმზე, რომელზეც მივა ოქტომბერში ადამიანი, მისი ხმა იყოს დაცული.

ამის შემდგომ, ოპოზიციურ პარტიებთან აუცილებლად ვიმსჯელებთ, მაგრამ მე ჩემს ხედვას გეუბნებით — ნაციონალური მოძრაობის კანდიდატს, დიდი ალბათობით, ჩვენ მხარს არ დავუჭერთ და შევეცდებით, რომ სხვა პროდასავლურ ოპოზიციურ პარტიებთან ერთად შევქმნათ ის მძლავრი მიზიდულობის ცენტრი, რომელიც გასაღებია ქვეყნის განვითარების", — თქვა მან.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.