დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, ინდოეთში მოსახლეობასა და კორონავირუსის შემთხვევების რაოდენობას თუ გადავთვლით, იმაზე მძიმე სიტუაცია არ არის, რაც ჩვენ შემოდგომაზე გქვონდა. ამის შესახებ მან პალიტრანიუსის ეთერში ისაუბრა.

"რა თქმა უნდა, ინდოეთში მძიმე სიტუაციაა, მაგრამ თუ ახლა გადაითვლით ინდოეთის მოსახლეობას და რამდენიმე შემთხვევაა, ეს არ არის იმაზე მძიმე სიტუაცია, რაც ჩვენ გვქონდა შემოდგომაზე. ეს არის ობიექტური რეალობა. სამწუხაროდ, ინდოეთში უფრო მეტი პრობლემაა ამ ადამიანების დამხარების აღმოჩენის თვალსაზრისით. ძალიან დიდი პრობლემები შეიქმნა ჟანგბადის მიწოდებაზე, ჰოსპიტალიზაციაზე და რა თქმა უნა, ძალიან მძიმე სიტუაციაა", — თქვა მან.

ბოლო რამდენიმე დღეა ინდოეთში კორონავირუსის შემთხვევების რეკორდულად მაღალი დღიური შემთხვევები დაფიქსირდა, ამასთან, გავრცელდა ე.წ. ინდური შტამიც. Worldometers-ის 26 აპრილის მონაცემებით, ბოლო 24 საათში კორონავირუსი იქ 319 435 ადამიანს დაუფიქსირდა. ჯამში ინდოეთში 17 625 735 ადამიანია დაინფიცირებული და საერთო რაოდენობით ის მსოფლიოში მეორე ადგილს იკავებს. ამჟამად, აქტიური შემთხვევების საერთო რიცხვი 2 მილიონს აჭარბებს. ბოლო მონაცმებით, ინდოეთში მილიარდ 300 მილიონზე მეტი ადამიანი ცხოვრობს.