ქართული ოცნების საზოგადოებასთან ურთიერთობის სამსახურის მდივანი, შალვა პაპუაშვილი აცხადებს, რომ ნაციონალური მოძრაობის თავმჯდომარე, ნიკა მელიას გარშემო დედამიწა ნამდვილად არ ტრიალებს, მათ შორის, არც ამნისტიის შესახებ შეთანხმებაში.

"მე იმედი მაქვს და ჩვენ ყველას იმედი გვაქვს ქართულ ოცნებაში და ყველაფერს ვაკეთებთ იმისთვის, რომ ეს იყოს როგორც ერთობლივი ინიციატივა, ასევე, ერთობლივად მიღებული საბოლოო ჯამში. [შეთანხმების] ერთ-ერთი დეტალი არის ამნისტია და არა იმიტომ, რომ ნიკა მელია გამოვიდეს ციხიდან, არამედ ამნისტია, როგორც მექანიზმი, რომ 20 ივნისის გარშემო არსებული სხვადასხვა შეფასება გადავდოთ გვერდზე და გავიხედოთ წინ.

აი, ეს არის ამ ამნისტიის მიზანი. არა ნიკა მელიას გამოყვანა ციხიდან, არამედ 20 ივნისთან დაკავშირებით სხვადასხვა შეფასების გვერდზე გადადება და წინ გახედვა. იმიტომ, რომ იცით, ნიკა მელიას გარდა, მის გვერდით მყოფი სხვა ხალხი ძალადობაში ბრალდებული, მათ მიმართ არის საქმეები. ასე, რომ ნიკა მელიას გარშემო დედამიწა ნამდვილად არ ტრიალებს, მათ შორის, არც ამ შეთანხმებაში", — განაცხადა პაპუაშვილმა.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი: