გირჩი — მეტი თავისუფლებას ლიდერი, ზურაბ ჯაფარიძე აცხადებს, რომ "ჯალათებსა" და 20 ივნისის ღამეს ბრძანებების გამცემებს ამნისტია არ შეეხებათ.

"არავინ არ აპირებს, რომ ჯალათებს შეეხოთ ეს ამნისტია, ან ბრძანების გამცემებს. მითუმეტეს, არც პოლიტიკური თანამდებობის პირებს. ეს იყო საერთო ატმოსფერო, რომელიც იყო ამ შეხვედრაზე, ესე იქნება პოზიციონირება ჩვენი მხრიდან", — განაცხადა ჯაფარიძემ.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა ვკითხულობთ, რომ მხარეებმა ხელმოწერიდან ერთი კვირის ვადაში, რეაგირება უნდა მოახდინონ "პოლიტიზებულ მართლმსაჯულებად" აღქმულ ორ საკითხზე, ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს.

გაიგეთ მეტი: