გასული წლის ბოლოს გიყვებოდით, რომ მეცნიერებმა პირველად შეძლეს შორეული და სტაბილური კვანტური ტელეპორტაციის მიღწევა. შემდეგი ნაბიჯი კვანტური კომპიუტერის კრიოგენული ჩიპის შექმნა იყო, ამას კი მოჰყვა კვანტური ჰოლოგრამის შემუშავებაც.

ამ ყველაფრის გათვალისწინებით, შეგვიძლია ვთქვათ, რომ უკანასკნელ თვეებში კვანტური ინტერნეტის შექმნა მეცნიერებისთვის სულ უფრო რეალური მიზანი გახდა. ამას კი, თეორიულად, შეუძლია შეცვალოს ყველაფერი, დაწყებული გამოთვლითი სიჩქარიდან, დასრულებული პრივატულობითა და ყოველდღიური შესაძლებლობებით. ახალი კვლევა კი ამტკიცებს, რომ ამ ყველაფერთან გაცილებით ახლოს ვართ, ვიდრე აქამდე გვეგონა.

როგორც ნაშრომიდან ვიგებთ, ნიდერლანდების დელფტის ტექნოლოგიური ინსტიტუტის მეცნიერებმა შეძლეს და პირველი კვანტური ქსელი შექმნეს, ამაში კი კვანტური გადახლართულობა გამოიყენეს. შედეგად, მათ სამი მოწყობილობა წარმატებით დააკავშირეს ერთმანეთთან. ეს ნაშრომი შეიძლება კვანტური ინტერნეტის შექმნის სათავედ მივიჩნიოთ. ის, პრაქტიკულად, ქმნის საფუძველს, რომელზეც კვანტური ინტერნეტის ტექნოლოგია უნდა დაშენდეს. შესაბამისი კვლევა რამდენიმე დღის წინ, ჟურნალ Science-ში გამოქვეყნდა. ხოლო საკითხის შესახებ, გუნდის მიერ მომზადებულ ვიდეოს შეგიძლიათ აქვე გაეცნოთ.

"ეს პირველი შემთხვევაა, როცა კვანტურ პროცესორებს შორის ქსელური კავშირი დამყარდა", — თქვა ნაშრომის წამყვანმა ავტორმა — რონალდ ჰანსონმა Inverse-ისთვის მიცემულ ინტერვიუში. "კავშირი ორ პროცესორს შორის არაერთ პლატფორმაზე იქნა ნაჩვენები, გასული ათწლეულის განმავლობაში, თუმცა, მათ ქსელისთვის არ მიუღწევიათ", — დასძინა მან.

რა მოხდა ექსპერიმენტისას

აღნიშნული ექსპერიმენტის ფარგლებში მეცნიერებმა სამი კვანტური პროცესორი გამოიყენეს და მათ პირობითად ელისი, ჩარლი და ბობი დაარქვეს. ექსპერიმენტის მიმდინარეობისას ბობმა ერთგვარი შუამავლის როლი შეითავსა და ელისიდან მიღებული ინფორმაციის ჩარლისთან გაგზავნა უზრუნველყო. თითოეული პროცესორი ექსტრემალურად კომპლექსური სისტემით იყო აღჭურვილი, რომლითაც ფოტონების აღმოჩენა და სხივების გაყოფა იყო შესაძლებელი. ამ ყველაფრის დახმარებით კი მეცნიერებმა შეძლეს სამ პროცესორს შორის კვანტური გადახლართულობის დემონსტრაცია. სხვაგვარად რომ ვთქვათ, მათ შეძლეს კვანტური ინტერნეტის ქსელის შექმნა.

რა განასხვავებს კვანტურ კომპიუტერსა და ინტერნეტს ტრადიციულისგან

კვანტური კომპიუტერი ტრადიციულისგან ერთი ფუნდამენტური რამით განსხვავდება. იქ, სადაც კლასიკური კომპიუტერები ასრულებენ გაანგარიშებებს ბიტების გამოყენებით, რომელსაც შეიძლება ჰქონდეს ორიდან ერთი მდგომარეობა (როგორც წესი წარმოდგენილია 1-ით ან 0-ით), კვანტური ბიტი ან კუბიტი შეიძლება არსებობდეს ერთდროულად ბევრ მდგომარეობაში. სწორედ ეს აძლევს კვანტურ კომპიუტერს გადამწყვეტ უპირატესობას და საშუალებას, უფრო სწრაფად გადაწყვიტოს ესა თუ ის პრობლემა.

თუმცა, კუბიტების ტრანსმისია არც ისე ადვილი საქმეა. იმისათვის, რომ კვანტური კომპიუტერები ერთმანეთთან დაკავშირდეს, მეცნიერები კვანტური გადახლართულობის კონცეპტს იყენებენ. კვანტური გადახლართულობა კი ორი ან მეტი ნაწილაკის იდენტურ მდგომარეობას მოიცავს. სხვაგვარად რომ ვთქვათ, კვანტურად გადახლართული ნაწილაკები ერთნაირად იქცევიან და გვაძლევენ ინფორმაციას ერთმანეთის მდგომარეობის შესახებ, დაშორების მანძილის მიუხედავად. ეს ფენომენი მონაცემთა მიმოცვლისთვის ძალიან სასარგებლო რამაა, რადგან ინფორმაცია ერთი წერტილიდან მეორეში, მანძილის მიუხედავად, ერთნაირად მყისიერად იგზავნება. ეს პრინციპი კი უდევს საფუძვლად კვანტური ინტერნეტის შექმნის იდეას, როლის დაჰაკვაც, ტრადიციული ინტერნეტისგან განსხვავებით, შეუძლებელია, რადგან ამ გზით გადაცემული სიგნალი, მცირე ჩარევის შემთხვევაშიც, მყისიერად იცვლება.

როგორც უკვე ვთქვით, წარსულში ორ მოწყობილობას შორის კვანტური კავშირის დამყარების პრეცედენტები უკვე იყო, თუმცა, ეს პირველი შემთხვევაა, როცა სამმა მოწყობილობამ კვანტურ გადახლართულობაზე დაყრდნობით მომუშავე ქსელში ინფორმაციის მიმოცვლა მოახერხა. ეს ნაშრომი კი მნიშვნელოვანი წინგადადგმული ნაბიჯია კვანტური ინტერნეტის ამუშავების კუთხით. თუმცა, უნდა ითქვას, რომ მიუხედავად ამ მიღწევისა, ამ ტექნოლოგიას ამოქმედება უახლოეს მომავალში არ უწერია. კვანტური გამოთვლები ჯერ კიდევ შესწავლის ეტაპზეა და მათთვის ძალიან დიდი ენერგიაა საჭირო, ისევე, როგორც სადენებისთვის, რომელთაც მსოფლიო კვანტური ინტერნეტით უნდა უზრუნველყოს. თუმცა, მიუხედავად ამ დაბრკოლებებისა, აღნიშნული მიღწევა მაინც არის მნიშვნელოვანი ნაბიჯი, რომელიც ერთ დროს, მომავალში, ინტერნეტის რევოლუციას დაედება საფუძვლად.

ასევე იხილეთ: