ნაციონალური მოძრაობის თავმჯდომარის, ნიკა მელიას განცხადებით, მისთვის მისაღებია ევროპარლამენტარების თავდებობის საკითხი. ამის შესახებ მან ციხიდან მთავარ არხთან სატელეფონო ინტერვიუში განაცხადა.

"ჩემთვის აბსოლუტურად მისაღებია ევროპარლამენტარების თავდებობა და ეს არის ჩემთვის კომიკური, როცა ვისმენ ქართული ოცნების კომენტარებს, რომ ეს შეთანხმებაში არ არისო გათვალისწინებულიო. მაპატიეთ და შეთანხმებაში ის არის გათვალისწინებული, რომ გამოსასყიდი უნდა ჩამრიცხვოდა? აბა წაიკითხონ კარგად, შეთანხმებაში ეს არ წერია.

ერთი სიტყვით, ჩემთვის პრინციპულად მნიშვნელოვანია, რომ ახლა ნაცვლად იმისა, რომ კრიზისი დაიძლიოს, კრიზისი არ გავაღრმავოთ და მერწმუნეთ, საზოგადოებრივ-პოლიტიკური კრიზისი მნიშვნელოვნად გაღრმავდება ქვეყანაში, თუ ამნისტიის კანონი თუნდაც ერთ მოძალადე პოლიციელზე მაინც გავრცელდება, ამაში ვარ ღრმად დარწმუნებული. მათთვის, ვინც ჩემთან მიმართებაში რაღაცნაირად დარდობს და ამბობს, რომ ეს რაიმე სახით მე დამაკნინებს, მე ეს ვერანაირად ვერ დამაკნინებს", — განაცხადა მელიამ.

მელია დოკუმენტში ამნისტიის კანონს ოპოზიციისთვის დაგებულ ხაფანგად აფასებს. მისი თქმით, ქართული ოცნება მოითხოვს, რომ მუხლი გავრცელდეს სამართალდამცავი უწყებების წარმომადგენლებზე და უხერხულ მდგომარეობაში ჩააგდებს ოპოზიციური ფლანგის ხელმომწერებს.

ლელოს ლიდერებმა ბრიუსელში ვიზიტისას ევროპარლამენტარებს შესთავაზეს, თავდებში დაუდგნენ ნაციონალური მოძრაობის თავმჯდომარეს, ნიკა მელიას. ამ ინიციატივას მხარს უჭერს პარლამენტის წევრი სალომე სამადაშვილი, რომელსაც შეთანხმების საკითხთან დაკავშირებით ენმ-სთან უთანხმოება აქვს.

ქართული ოცნების დეპუტატის, გურამ მაჭარაშვილის განცხადებით, ევროპარლამენტარების თავდებობით მელიას ციხიდან გამოსვლა წინააღმდეგობაში მოდის შეთანხმების დოკუმენტთან. მანვე აღნიშნა, რომ მელიას აქვს დილემა: "გამოვა — ვაი, ვერ გამოვა — ვუი".