ჯადოქრებმა და თვით მაგლებმაც კი უკვე კარგად იციან, რომ ჯადოსნური სამყარო მსახიობმა ჰელენ მაკკრორიმ დატოვა: ჰარი პოტერის ფილმებში ნარცისა მალფოის როლის შემსრულებელი 16 აპრილს გარდაიცვალა.

ამ ფაქტმა უამრავ მაყურებელს დასწყვიტა გული, თუმცა ეს სამწუხარო სიახლე განსაკუთრებით დამამწუხრებელი, რა თქმა უნდა, მაკკრორის უახლოესი გარემოცვისთვის იყო. მათ შორის იყო მსახიობი ტომ ფელტონი, რომელიც ასევე ჰარი პოტერის ფილმების ფანებისთვის კარგად ნაცნობი სახეა.

დრაკოს როლის ამ შემსრულებელმა ინსტაგრამის პირად გვერდზე ჰელენ მაკკრორის, რომელიც ჯადოქრების სამყაროში დედამისის როლს ასრულებდა, ემოციური სიტყვებით მიაგო პატივი:

"ძალიან სამწუხაროა, რომ ასე მოულოდნელად მიწევს გამომშვიდობება. არასდროს მომეცა შანსი, რომ მისთვის მეთქვა, თუ რამდენად დამეხმარა კამერის წინ და მის მიღმაც პიროვნულ განვითარებაში. საკუთარი თავის მიმართ მომთხოვნი, გონებამახვილი, ენამჭევრი და გულკეთილი ადამიანი იყო. მადლობა, რომ გზა გამინათე და მაშინ ჩამჭიდე ხელი, როცა ეს მჭირდებოდა", — დაწერა ტომ ფელტონმა და ის კადრი გამოაქვეყნა, რომელშიც ნარცისა და დრაკო ხელიხელჩაჭიდებულები ერთად არიან.

ინგლისელი მსახიობი ჰელენ მაკკრორი 52 წლის ასაკში ტვინის კიბოს დიაგნოზით გარდაიცვალა.

ჰარი პოტერთან ერთად, მას მაყურებელი ასევე კარგად იცნობს ფილმებიდან The Count of Monte Cristo (გრაფი მონტე კრისტო) თუ The Queen (დედოფალი) და სერიალებიდან Peaky Blinders და Penny Dreadful.