ქართული ოცნების თავმჯდომარემ, ირაკლი კობახიძემ პარტიიდან 6 დეპუტატის წასვლა და ექსპრემიერის, გიორგი გახარიას გუნდში გადასვლა სამწუხარო მოვლენად და არასწორ დასაწყისად შეაფასა. მისი თქმით, ასეთი დასაწყისით წარმატებული ვერავინ იქნება.

"სამწუხაროა, რაც ჩვენ ვნახეთ. ეს არ იყო სწორი ქცევა, მოქმედება, რაც ჩვენ ვიხილეთ. ბევრი მიზეზის გამო, მათ შორის, იმ მიზეზიზს გამოც, რომ მანამდე არ ყოფილა არავითარი საუბარი, კონსულტაციები. როდესაც არასწორად იწყებ პოლიტიკურ პროცესში ნაბიჯების გადადგმას, ბუნებრივია, ეს პროცესი არასწორადაც გაგრძელდება. ამ ყველაფერს ჰქონდა არასწორი დასაწყისი, მგონია, რომ გაგრძელებაც ექნება შესაბამისი. ასეთი დასაწყისით წარმატებული ვერავინ იქნება", — განაცხადა მან.

ქართული ოცნების ექვსი დეპუტატი ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდება. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.