საქართველოს პარლამენტის დეპუტატი ირმა ინაშვილი მიიჩნევს, რომ 25 მილიონი ლარი საკმარისი არ არის და საპატრიარქოს დაფინანსება უნდა გაიზარდოს. ამის შესახებ ინაშვილმა ტელეკომპანია იმედის ეთერში განაცხადა:

"ეს 25 მილიონი ლარი არანაირად არ არის საკმარისი ეკლესიისთვის. არ ჰყოფნის ეკლესიას. ჩვენი ბიუჯეტი ათ მილიარდ ლარზე ცოტა მეტია. ამ 10 მილიარდში ჩვენ შეგვაქვს როგორც გადამხდელის წვლილი. ჩვენ, მართმადიდებლები სამ მილიონზე მეტი ვართ ამ ქვეყანაში და ჩვენ გვინდა, რომ არათუ შეუწყდეს ეკლესიას დაფინანსება, არამედ გაიზარდოს. ჩვენ, მოგეხსენებათ, ვაფინანსებთ საზოგადოებრივ მაუწყებელს ბიუჯეტიდან 40 მილიონით. ჩვენ გვინდა, რომ ავაშენოთ ხალხის ტელევიზია და ვერა და ვერ ავაშენეთ ასეთი ტიპის ტელევიზია, მაგრამ ჩვენ გვინდა ეკლესია ფინანსდებოდეს და მზად ვართ 25 მილიონი კი არა, 80 და 100 მილიონი ლარი მიიღოს ეკლესიამ ჩვენი გადასახადებიდან."