ნამახვანჰესის მშენებლობის მოწინააღმდეგე აქტივისტის, ვარლამ გოლეთიანის განცხადებით, ხელისუფლება რკინის ფარდით თრგუნავს მათ ბრძოლას და პროტესტს.

"ორი რამ უნდა აღინიშნოს, პირველი ის, რომ პირდაპირ ხელისუფლება რეპრესიების გზებით ცდილობს ჩაახშოს ჩვენი პროტესტი და თრგუნავს ამ რაღაც რკინის ფარდით ჩვენს სამართლიან და არგუმენტირებულ ბრძოლას და პროტესტს, მეორე ის, რომ როდესაც ვამბობდით ჩვენი ხეობა არის გადაცემული კერძო საკუთრებაში, ის აღარ არის ჩვენი და ეს არის მთელი გეოგრაფიული არეალი, ეს არ არის პატარა ტერიტორია. ხედავთ, რომ პრაქტიკულად შესასვლელი ხეობის აქვთ მთლიანად ჩაკეტილი, ამიტომ შეიძლება ვიღაცებს ეგონათ, რომ ეს გაზვიადებული ნათქვამი იყო, ახლა დღეს თვალნათლივ ხედავს მთელი საზოგადოება, რომ რასაც ჩვენ ვამბობდით, არის აბსოლუტური სიმართლე", — აცხადებს გოლეთიანი.

მისივე თქმით, საზოგადოებამ მთელ ამ პროცესზე ადეკვატური რეაქცია უნდა აჩვენოს.

"მე ვფიქრობ, რომ მთელმა საზოგადოებამ ამაზე ადეკვატური რეაქცია უნდა აჩვენოს, მთელ ამ პროცესზე. წარმოუდგენელია, რომ ეს პროცესი ასე გაგრძელდეს და ჩვენ როგორც ერი და საზოგადოება ამ ყველაფერს ასე შევეგუოთ. რა თქმა უნდა, ინვესტიციების წინააღმდეგი არავინ არ არის ამ ქვეყანაში, მით უმეტეს ჩვენ და მივესალმებით ყველა ჯანსაღ ინვესტიციას, მაგრამ ინვესტიცია არსებობს ცუდი და კარგი", — ამბობს აქტივისტი.

გუმათჰესთან, ნამოხვანისკენ მიმავალ გზაზე პოლიციამ რკინის ჯებირები აღმართა. როგორც ადგილზე მყოფი On.ge-ს ჟურნალისტი გვეუბნება, ამ ფაქტმა მოსახლეობის და ადგილობრივი აქტივსიტების უკამყოფილება გამოიწვია, რის გამოც ისინი დილიდან რკინის ჯებირებზე აბრახუნებენ და ხმაურობენ.