სოფელ გუმათში, სადაც ნამახვანჰესის მშენებლობის მოწინააღმდეგეები არიან შეკრებილი ვითარება დაიძაბა. პოლიციასა და აქციის მონაწილეებს შორის დაპირისპირებაა, რისი მიზეზიც კომპანია ENKA-ს მანქანების გატარება გახდა.

"ჩვენ ვთქვით დღეს, რომ არ გავატარებდით კომპანიის მანქანებს, ამიტომ ხელაწეულები დახვდნენ ბიჭები და პირდაპირ გადმოვიდა პოლიცია დარბევაზე, ძალადობაზე. ძალა გამოიყენეს, მანქანებს მიახეთქეს ბიჭები", — ამბობს აქტივისტი ვარლამ ლიპარტელიანი.

აქტივისტების გავრცელებულ ვიდეოში ისმის, რომ ხალხი სასწრაფოს გატარებას ითხოვს და ერთი პირის დაშავებაზე საუბრობს. გარდა ამისა, ისინი ერთმანეთს ხელების აწევისა და უკან დახევისკენ მოუწოდებენ.

On.ge შესაბამის უწყებებთან დაშავებულებისა და დაკავებულების შესახებ ინფორმაციის გადამოწმებას ცდილობს. მათ პასუხს მიღებისთანავე შემოგთავაზებთ.

განახლება: შინაგან საქმეთა სამინისტროს განცხადებით, სოფელ გუმათში 6 პირი დააკავეს. უწყებაში ამბობენ, რომ აქცის მონაწილეებმა არ გაათავისუფლეს გზა, ამიტომ გამოიყენეს "იძულების პროპორციული ღონისძიებები".