ალბათ, ყველას გვქონია ისეთი შემთხვევა, როდესაც ტელეფონის ნომერი შეგვშლია და უცხო ადამიანთან დაგვირეკავს. ასეთ დროს, უბრალოდ ბოდიშს ვიხდით, ნომერს ვაზუსტებთ და ჩვენი ყოველდღიურობაც ჩვეულ რიტმს უბრუნდება. 12 აპრილს ასეთი ზარი პიცერია Five Sisters Pizza-შიც შევიდა — ქალი თარჯიმანთან დაკავშირებას ცდილობდა.

"რა პიცა, თარგმნა მინდა მე. ქართულიდან ინგლისურად", — მიუხედავად შეცდომაზე მითითებისა, ქალმა ტექსტის თარგმნის თხოვნით პიცერიაში სამჯერ დარეკა.

ეს სახალისო ამბავი მომხმარებლებს Five Sisters Pizza-მ საკუთარ ფეისბუქ გვერდზე გაუზიარა. მას შემდეგ, რაც ქალმა მესამედ დარეკა, პიცერია სათარგმნი ტექსტით დაინტერესდა.

როგორც აღმოჩნდა, მომხმარებელს ამერიკელი სიძისთვის დაბადების დღის მისალოცი ტექსტის თარგმნა სურდა. "ჩვენ კი მართლა პიცერია ვართ, მაგრამ გამომიგზავნეთ და დაგეხმარებით", — პიცერიამ მომხმარებელს დახმარება შესთავაზა.

ფოტო: Five Sisters Pizza

მას შემდეგ, რაც პიცერიის თანამშრომელმა ტექსტის თარგმნა დაიწყო, მეოთხე ზარმაც არ დააყოვნა: "ისა... შვილო, რა პიცები გაქვთ თქვენ? მომაშია ამასობაში", — დაჟინებული მომხმარებელი ამჯერად სწორ ნომერზე რეკავდა.

შემდეგში თუ ნომერი შეგეშლებათ, არ დანებდეთ: ვინ იცის, იქნებ იღბლიანი მომხმარებლის მსგავსად, ერთი გასროლით თქვენც ორი კურდღელი დაიჭიროთ!