პარტია გირჩი — მეტი თავისუფლების ორგანიზებით, უკრაინის საელჩოსთან სოლიდარობის აქცია სახელწოდებით, ხელები შორს უკრაინისგან და საქართველოსგან გაიმართა.

"ეს არის სოლიდარობის აქცია, პირველ რიგში, უკრაინელი ხალხის მიმართ. ჩვენ გვგონია, რომ რეაგირება, რომელსაც ასეთ შემთხვევებში საქართველოს ხელისუფლება აკეთებს, მათ შორის, იმასთან დაკავშირებით, რასაც რუსეთი უკრაინაში სჩადის, არის ფორმალური ხასიათის. ეს არ არის გულწრფელი გვერდში დგომა და პროტესტი. მგონია, რომ ეს არის ფართო პოლიტიკის ნაწილი, რომელსაც ისინი ეძახიან რუსეთის არგაღიზიანების პოლიტიკას.

ჩვენც და უკრაინაც ვართ სტრატეგიული პარტნიორები იმ თვალსაზრისით, რომ ჩვენ ორივე მივდივართ დასავლეთისკენ, თავისუფლების სამყაროსკენ, ორივეს გვინდა გავხდეთ ნატოსა და ევროკავშირის წევრი. პირველ რიგში, იმის გამო, რომ ჩვენი მისწრაფებები მიდის დასავლეთისკენ, ჩვენ გვაქვს პრობლემები ჩრდილოეთ მეზობელთან. ყოველთვის, როცა გვიჭირდა, უკრაინა ჩვენს გვერდით იდგა და ყოველთვის, როცა უკრაინას უჭირს, ჩვენი ქვეყანა არა ფორმალურად, გულწრფელად უნდა დაუდგეს გვერდით", — უთხრა ზურაბ ჯაფარიძემ რადიო თავისუფლებას.

აქციას შეუერთდა პოლიტიკური მოძრაობა დროას დამფუძნებელი, ელენე ხოშტარიაც. მისი თქმით, რაც უკრაინაში ხდება, არის საერთო პრობლემა, როგორც საქართველოსთვის, ასევე, მთლიანად რეგიონისა და მსოფლიოსთვის.

"ეს არის მთლიანად მომავლის საქმე. როგორი იქნება მომავალი, მათ შორის, ჩვენი ქვეყნის, ამიტომ ძალიან მნიშვნელოვანია მკაფიო, აქტიური პოზიციონირება. მთავრობა, ჩვენ ვნახეთ, რომ წლების განმავლობაში ერიდება ძალიან მკაფიო და აქტიურ პოზიციას. შესაბამისად, ჩვენი, ოპოზიციისა და სამოქალაქო სექტორის ვალია, როგორც ქვეყანამ, ეს პოზიციონირება მოვახდინოთ", — თქვა მან.

30 მარტს უკრაინის შეიარაღებული ძალების მთავარდარსალმა განაცხადა, რომ რუსეთმა საზღვართან და ოკუპირებულ ტერიტორიებზე ბატალიონების მობილიზება მოახდინა, რამაც ქვეყნის უსაფრთხოებას საფრთხეს უქმნის.

ვითარება შეაფასეს პენტაგონში და რუსეთის ქმედებები დაგმეს. როგორც პენტაგონის პრესსპიკერმა განაცხადა, აშშ ამ საკითხზე NATO-ს მოკავშირეებს ესაუბრება.

სატელეფონო საუბარი შედგა აშშ-ს და უკრაინის თავდაცვის მინისტრებს შორის. ლოიდ ოსტინმა უკრაინელ კოლეგას, ანდრეი ტარანს დაუდასტურა მხარდაჭერა და დაგმო რუსული პროვოკაცია. გარდა ამისა, მან განაცხადა, რომ ესკალაციის შემთხვევაში აშშ უკრაინას არ მიატოვებს.

უკრაინული მედიის ინფორმაციით, 11 აპრილს რუსეთის კონტროლირებადმა ძალებმა დონბასში ცეცხლის შეწყვეტის შეთანხმება ათჯერ დაარღვიეს, რა დროსაც, ერთი უკრაინელი სამხედრო დაიღუპა, ერთი კი დაიჭრა.

მედიის ცნობით, უკრაინული პოზიციების მიმართულებით ნაღმმტყორცნი და ტანკსაწინააღმდეგო ყუმბარმტყორცნები გამოიყენეს, რაც მინსკის შეთახმმების თანახმად აკრალული იყო. უკრაიუნული მედიის ინფორმაციით, უკრაინელმა ჯარისკაცებმა მათ საპასუხო ცეცხლი გაუხსნეს.

გარდა ამისა, შვედმა დიპლომატმა, კარლ ბილდტიმ გაავრცელა ვიდეო, სადაც ჩანს, რომ რუსეთი უკრაინისკენ სამხედრო ძალების გადაადგილებას აგრძლებეს. ამის შესახებ მან საკუთარ ტვიტერზე დაწერა.