საქართველოს ჟურნალისტური ეთიკის ქარტიის განცხადებით, მედიის მუშაობის შეზღუდვა დაუშებელია. ასე ეხმაურებიან ისინი ფაქტს, რომ შინაგან საქმეთა სამინისტროს წარმომადგენლები ჟურნალისტებს ნამახვანში შესვლისა და მუშაობის უფლებას არ აძლევენ.

"ბათუმელების ინფორმაციით, პოლიციამ გუმათჰესთან მოწყობილ სასაზღვრო-გამშვებ პუნქტზე შეაჩერა ყველა გადამღები ჯგუფი და მათ გადაადგილების უფლებას არ აძლევს. ამ ეტაპზე უცნობია, რა მიზეზით იზღუდება ჟურნალისტების გადაადგილება. ჟურნალისტური ეთიკის ქარტია მოუწოდებს ხელისუფლებას, ჟურნალისტებს არ შეუშალოს ხელი გადაადგილებაში და უზრუნველყოს მათთვის ინფორმაციის ხელმისაწვდომობა", — აცხადებენ ქარტიაში.

ქარტია მოუწოდებს სამართალდამცავ ორგანოებს, არ ჩაერიონ ჟურნალისტურ საქმიანობაში და მედიას შეუქმნან შესაბამისი სამუშაო პირობები.

აღნიშნულს გამოეხმაურა კოალიცია მედიის ადვოკატირებისთვის და განაცხადა, რომ კრიზისულ სიტუაციაში გადამწყვეტად მიაჩნიათ, ჟურნალისტებს მიეცეთ შესაძლებლობა თავისუფლად ასახონ განვითარებული მოვლენები, საზოგადოებას კი შეუნარჩუნდეს უფლება მიიღოს სრული ინფორმაცია ნამოხვანში მიმდინარე პროცესებზე.

გუშინ, 10 აპრილს რიონში კაცი გაუჩინარდა, მას ამ დრომდე ეძებენ. როგორც შინაგან საქმეთა სამინისტროში On.ge-ის უთხრეს, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

დღეს, 11 აპრილს კი შინაგან საქმეთა სამინისტომ სოფელ ნამახვანიში გაშლილი საპროტესტო კარვები დაშალა და ეს რიონის წყლის დონის მატების გამო აქციის მონაწილეთა სიცოცხლისა და ჯანმრთელობის დაცვის მოტივით ახსნა. აქტივისტი, ვარლამ გოლეთიანი აცხადებს, რომ წყლის დონის მატებასთან კარვების დაშლა არაფერ კავშირშია. მისი თქმით, იქ, სადაც კარვებია განთავსებული, წყლის დონე არ იმატებს იმ ზღვრამდე, რომ ამ პროცესს ხელი შეუშალოს.