Friends-ის გულშემატკივრებისთვის კარგი ამბავი გვაქვს: სპეციალური ეპიზოდის გამოსვლამდე სულ ცოტა დრო რჩება! ამას გადასაღები მოედნიდან ახალი ფოტოც ადასტურებს, რომელიც სერიალის ოფიციალურ ინსტაგრამ გვერდზე გამოქვეყნდა.

აღსანიშნავია, რომ სერიალის მსახიობმა, მეთიუ პერიმ გულშემატკივრებს საკუთარ ინსტაგრამზე სპეციალური ეპიზოდის გადაღებებიდან ფოტო გაუზიარა. მიუხედავად იმისა, რომ ფოტო მალევე წაშალა, აღფრთოვანებულმა ფანებმა მისი შენახვა მაინც მოასწრეს.

ფოტო: Instagram

შეგახსენებთ, რომ ჯერ კიდევ 2020 წლის დასაწყისში დადასტურდა, რომ ერთ-ერთი ყველაზე ცნობილი სატელევიზიო შოუს გმირები ეკრანებზე ბრუნდებოდნენ. მომავალ ეპიზოდში კვლავ ვიხილავთ მთავარი როლის შემსრულებელ მსახიობებს: ჯენიფერ ენისტონს, კორტნი კოქსს, ლიზა კუდროუს, მეთ ლებლანკს, მეთიუ პერისა და დევიდ შვიმერს. თუმცა, სავარაუდოდ, მათ მეგობრების ერთ ჩვეულებრივ სერიაში ვერ ვიხილავთ: მათი შეხვედრა სცენარის გარეშე წარიმართება და მეტწილად ინტერვიუებისგან შედგება.

სპეციალური ეპიზოდის შესახებ მარტში დევიდ შვიმერმაც ისაუბრა და გადაღებების დაწყება დააანონსა.

"დაახლოებით ერთ თვეში ლოს-ანჯელესში მივემგზავრები. ვიპოვეთ გზა, რომ გადაღებები უსაფრთხოდ დაიწყოს და ამის გამო მეტ წილად გარე სივრცე შევარჩიეთ. ხომ გესმით, უსაფრთხოების პროტოკოლის გამო", — აღნიშნა მან ენდი კოენის რადიოშოუში სტუმრობისას.

აღსანიშნავია, რომ ახალი სერია, წესით, 2020 წელს უნდა გამოსულიყო, თუმცა გადაღებები პანდემიის გამო გადაიდო.

შოუს ამ ერთგვარ გაგრძელებაზე WarnerMedia მუშაობს და მას ახალ სტრიმინგ სერვისზე — HBO Max-ზე ვიხილავთ.

ამავე თემაზე: